BAKI, 27 noyabr — Sputnik. Xəbər verildiyi kimi, Nazirlər Kabinetinin (NK) qərarı ilə 2018-ci ilin 1 yanvar tarixindən yeni idxal və ixrac gömrük rüsumları tətbiq olunacaq. Yəni ki, gömrük rüsumları artırılacaq.
Bu xəbər yayılar-yayılmaz, daha çox avtomobillərin gələn ilki qiymətlərinin necə olacağı sualı gündəmi məşğul etdi. Dərhal aparılan iqtisadi hesablamalar ağrılı bir gerçəyi ortaya çıxardı.
Belə ki, Dövlət Gömrük Komitəsinin (DGK) elektron kalkulyatorunda aparılan kiçik araşdırma zamanı məlum olub ki, 2018-ci ildə 9500 dollarlıq (16 min manatlıq) 5.7 mühərrikli bir avtomobilin, ölkəyə gətirilən zaman ödənəcək gömrük və vergi xərcləri ilə birlikdə qiyməti 80 min 840 manat 99 qəpik olacaq.
Əksəriyyət bu fakt qarşısında heyrət və narazılıqla çiynini çəksə də, şəxsən mən əminəm ki, müvafiq qurumlar bu addımı atarkən, camaatın rahatlığını nəzərə alıb. Məsələn, yollardakı tıxaclardan əhalinin cana doyduğunu düşünən NK problemi kökündən həll etməyə qərar verib.
Həqiqətən, birdən-birə qiymətini 5 dəfə qaldırsan, hansı belə filan oğlu maşın almağı ağlına gətirər? Deməli, ölkəyə avtomobil idxalı 5 dəfə azalacaq, nəticədə də yaxın illərdə tıxac səviyyəsinin 5 dəfə artması təhlükəsi önlənmiş olacaq.
Bu müşkülün həllini də, birbaşa dəxli olan "Azəravtoyol" ASC-yə yox, DGK-ya həvalə ediblər ("Azəravtoyol"un heç Bakı-Sumqayıt yolundakı tıxacın öhdəsindən gələ bilməməsi də, görünür bu qərara təsir edib).
Bakı-Sumqayıt yolu demiş… Bax, dəli yadına daş saldılar. O yoldakı amansız tıxac azmış kimi, indi də yeni bəla peyda olub. Əslində, o qədər də yeni deyil, sadəcə kilometrlərlə və saatlarla davam edən tıxac daha geniş auditoriyanın bu bəlaya yoluxmasına və xəstəliyin sürətlə metastaz verməsinə təkan verir.
Məsələ ondadır ki, o yol üzrə fəaliyyət göstərən (adambaşı 1-2 manatlıq) taksilərin sürücülərinin nə yeyib-içdikləri, beyinlərinin oksigen qəbul-etmədiyi ciddi suallar doğurur. "Cəhənnəm, nə olar-olar, bircə evə çatım" deyə onların avtomobilinə oturan sərnişinlər, sanki özlərini ballistik raketin qanadları üzərində hiss edirlər. Nə özünə yazığı gələn var, nə daşıdığı sərnişinə, nə də ətrafdakı sürücülərə. Avtomobil sıxlığından sivişmək, ünvana azacıq tez yetişmək və yenidən oradan müştəri götürüb geri dönmək üçün hər cür həngamədən çıxırlar.
Qardaş, bu, avtomobil idarə etmək deyil, heç "avtoşluq" da deyil, tamam başqa bir müəmmadır. Mənzil başına çatanadək ölüb-dirilməkdir, ödünün ağzına gəlib-qayıtmasıdır, gözünün önündən bütün rəhmətlik qohum-əqrəbanın keçib-getməsidir, tanış olmayan sərnişinlərin bir-birilərinə sarılıb ölümqabağı vidalaşmasıdır.
Bəlkə heç bunlar da deyil, nə bilim nə kabusdur, nə xəstəlikdir…
Bu mənada bir təklif vermək istəyirəm. Daha doğrusu… Gözəl məmləkətimizin gözəl yetkililəri, hansısa problemin həllinə ərinərkən, "gərək sosial sifariş olsun" deyirlər ha, bax o hüququmdan yararlanaraq, eyni istəkdə olduğum hər kəsin adından sifariş verirəm: Ölkə ərazisində, xüsusilə şəhərlərarası, dübarə xüsusilə Bakı-Sumqayıt yolunda fəaliyyət göstərən bütün taksi sürücüləri psixoloji və narkoloji müayinədən keçirilsinlər!
Lakin:
İnsan naminə, vətəndaşın salamatlığı naminə, işləyib bu dövlətə vergi verə bilməsi naminə, Dövlət Statistika Komitəsinin açıqladığı əhali sayının həqiqətə uyğun olması naminə…
Və ölkədə infarkt riskinin azaldılması naminə, ürək-damar xəstəliklərinin daha geniş yayılmaması naminə, şəkərli diabetin bu qədər tez sonumuza çıxmaması naminə, yüksək qan təzyiqindən əziyyət çəkənlərin azacıq çox yaşamaları naminə…
Və qəzaların sayının ilbəil azaldığına dair rəsmi bəyanların daha inandırıcı olması naminə, yol polisinin barəsində yayılan videolara inanmamağımız naminə, birilərinin DYP-yə rəğbət aşılayan status və xəbərlərini "layk" etməyimiz naminə, başqa birilərinin "gözünün götürmədiyini" gözümüzün götürməsi naminə…
Və küçələrdə təkcə kasıb-kusubun şütümədiyi faktı naminə, əcəlin həm də əlində möhür tutanları izlədiyi gerçəyi naminə…
Və bankların maraqları naminə, yeni kreditlər naminə, köhnə kreditlərin batmaması naminə…
Və hər yanı bürüyən söküntü-tikintidə işlətmək üçün qonşu ölkələrdən fəhlə dilənməmək naminə…
Və ön cəbhədə düşmənin qarşısında dayanacaq əsgər tapa bilmək naminə
Bu sosial sifarişin "yem" üçün fürsətə çevrilməməsini acizanə və nacizanə şəkildə xahiş edirik!
