BAKI, 22 noyabr — Sputnik. Nazirlər Kabinetinin qərarı ilə 2018-ci ilin 1 yanvar tarixindən yeni idxal və ixrac gömrük rüsumları tətbiq olunacaq. Ölkədə olan iqtisadi vəziyyəti nəzərə alaraq təxmin etmək olar ki, gömrük rüsumları artırılacaq.
Təbii ki, bu da bahalaşmaya səbəb olacaq. Gömrük rüsumlarından birbaşa asılı olan sahələrdən biri də avtomobil bazarıdır. Ekspertlər 2018-ci ildə heç də bu sektorda müsbət hadisələrin baş verəcəyini düşünmürlər. Sputnik Azərbaycan bu sahənin peşəkarları ilə həmsöhbət olaraq, məsələnin görünməyən tərəflərinə aydınlıq gətirməyə çalışıb.
"VİP Escort Motors"un baş direktoru Rəşad Quliyev bildirib ki, avtomobil bazarında vəziyyət o qədər də ürək açan olmasa da, hal-hazırda alqı-satqı davam edir: "Əvvəllər də qeyd etdiyimiz kimi, gömrük və vergi rüsumlarının qaldırılacağı şayiələrinə inanan insanlar, yeni ili gözləmədən artıq işlənmiş və ya yeni avtomobil almağa başlayıblar. Lakin bu gün həmin şayiə öz təsdiqini rəsmən tapdı".
"İndiyə qədər qüvvədə olan idxal və ixrac gömrük rüsumlarının dərəcələri ləğv edilərək dəyişdirildi. Beləliklə, idxal rüsumlarının dəyişməsi hər bir sektor kimi avtomobil bazarına da öz təsirini, faiz dərəcəsindən asılı olaraq qismən və ya kəskin şəkildə göstərəcək" — mütəxəssis bildirib.
Onun fikrincə, artıq "dizini yerə qoymaqda olan" avtomobil bazarında yeni ildən hansı qiymətlərin olacağı dəqiq bilinməsə də, qiymətlərin artacağı qaçılmazdır: "Buna səbəb həm milli valyutamızın xarici valyuta qarşısında getdikcə dəyər itirməsi, həm də gömrük rüsumlarına edilən yeni dəyişiklikdir. Yeni qanun qüvvəyə minəcəyi tarixə kimi, köhnə (indiki) rüsumlarla gömrük etmək istəyən insanlar dayanmadan ilin sonuna kimi avtomobil və ya digər malları ölkəyə idxal edəcəklər. Təbii ki, bundan faydalanan isə yalnız avtomobil dəllalları və iş adamları olacaq".
R. Quliyev maşın bazarında qiymətlərin artacağını da istisna etmir: "Bazarda süni qiymət artımının yaranması labüddür. Köhnə qiymətlə gömrük olunaraq ölkəyə gətirilən avtomobillər saxlama yerlərinə qoyularaq, yanvar ayının 1-dən sonra yeni qiymətlə satışa çıxarılacaq".
"Biz artıq ilin sonuna kimi sifarişlərimizi almışıq. 2017-ci ilin sonuna kimi hamısını gətirməyə çalışacam ki, yeni rüsumlar bu avtomobillərə təsir etməsin" — həmsöhbətimiz bildirib.
Sığorta eksperti Xəyal Məmmədxanlı də avtomobil bazarında vəziyyətin ürəkaçan olmayacağını düşünür: "2018-ci ildə avtomobil bazarı çökəcək. Bunun əsas səbəbi də gömrük rüsumlarının artması və nəticədə ölkəyə avtomobil gətirməyin müşkül məsələyə çevriləcəyi ilə bağlıdır".
Mütəxəssisin fikrincə, əgər "Aİ-92" markalı bezinin qiymətində də bahalaşmas olarsa, vəziyyət daha da çətinləşəcək: "Bu səbəblər yerli bazarda avtomobillərin qiymətlərinə təsirsiz ötüşməyəcək. Təəssüf ki, qiymət artımı, nəinki avtomobil bazarına, həmçinin bank sektoruna, sığorta şirkətlərinə də güclü təsir edəcək. Bir sözlə, 2018-ci il heç də uğurlu il olmayacaq".
