BAKI, 28 aprel — Sputnik. Bakının mərkəzindən tutmuş, ölkənin ən ucqar qəsəbəsinə kimi hər yerdə kommunal xidmətlərlə bağlı problemlərin yaşandığı heç kimə sirr deyil. Bir yerdə su olanda, qaz olmur, o biri yerdə qaz olanda, su. Üçüncüdə elektrik enerjisinin mütəmadi kəsilməsi adi qaydaya çevrilib. Əhaliyə su, qaz, elektrik enerjisi verən dövlət orqanlarının sayğaclarındakı problem isə bitib tükənmək bilmir.
Vətəndaşların növbəti dəfə qarşılaşdığı problem də kommunal xidmətlərlə bağlıdır. Amma bu, nə suyun gəlməməsi, nə də sayğacın düzgün işləməməsidir. Bu dəfə Xırdalan şəhəri, Abşeron Gənclər Şəhərciyində yaşayan sakinlər tamamilə fərqli, qəribə problemlə qarşılaşıblar.
Şəhərcik sakinlərinin Sputnik Azərbaycan-ın redaksiyasına ünvanladıqları məktubda qeyd olunur ki, şəhərciyin su təminatı bu il yanvar ayının 1-dən "Azərsu"-yun birbaşa nəzarətinə keçib. Elə bütün problemlər də "Azərsu" ASC-nin şəhərciyə "girməsindən" sonra başlayıb.
Vətəndaşlar ayın sonunda mənzillərinə gələn su qəbzlərində maraqlı mənzərə ilə qarşılaşırlar. Qəbzlərdə sakinlərin öz adı yox, tanımadıqları insanların adı göstərilir. Bu problem artıq 4 aydır davam edir. Yerli sakinlər dəfələrlə "Azərsu"-yun Xırdalan şəhər bölməsinə müraciət etsələr də, hələ də məsələ tam olaraq öz həllini tapmayıb.
Bu yaşayış kompleksində yaşanan su problemi həm də çoxşaxəlidir. Belə ki, sakinlərdən birinin mənzilinin qapısına yapışdırılan bildirişin, həmin şəxsə uzaqdan-yaxından heç bir əlaqəsi yoxdur, başqa bir sakinin mənzilinə gələn bildirişdə öz ad-soyadı göstərilsə də, mənzilin nömrəsi və sayğacın kodu səhv göstərilib. Yaxud mənzilin nömrəsi düz, lakin başqa ad-soyadlı bildiriş alan sakin də var.
"Bu il yanvarın sonlarında "Azərsu"yun şəhərciyə təhkim olunmuş əməkdaşları mənzilimə gəldilər ki, sayğac möhürlənməli və mənzilinizin su təminatı "Azərsu"yun balansına keçməlidir. İşlərini gördülər, mənzilin və sayğacın nömrəsini qeyd etdilər və üstəlik yanvar ayında sərf etdiyim suya görə şərti olaraq 11 manat alıb getdilər. Növbəti ayın sonunda giriş qapıda bildiriş gördüm, amma tamam başqa adamın adı və ünvanın qeyd olunmuşdu" — deyir şəhərcik sakini Tural Məmmədov.
Onun sözlərinə görə, həmin bildirişi götürərək "Azərsu" nümayəndəliyinin şəhərcikdəki məntəqəsinə üz tutub: "Bildirişə baxıb, "texniki səhv gedib" dedilər və yenidən mənim sənədlərimlə tutuşdurub, sayğacımın və mənzilimin nömrəsini öz kitablarına qeyd etdilər. Söz verdilər ki, bir daha səhv təkrarlanmayacaq. Martın sonunda yeni bildiriş aldım, yenə eyni vəziyyət — həmin adamın ad-soyadı və ünvanı".
Sakin bu dəfə heç yerə yaxınlaşmır və bir az da gözləməyi üstün tutur: "Dedim, görüm apreldə necə olacaq. Bu dəfə də vəziyyət dəyişmədi — yanlış ünvan, yanlış ad-soyad. Üstəlik bu dəfə 38 manat borc məbləği ilə. Anlamıram, kimlərinsə səriştəsizliyi ucbatından biz niyə əziyyət çəkməli, stress keçirməliyik? Elementar işlərini görə bilmirlərsə, niyə o stulları zəbt ediblər? Belə də olmaz axı!"
"Azərsu" ASC-nin mətbuat xidmətinin rəhbəri Anar Cəbrayıllı da Sputnik Azərbaycan-a açıqlamasında etiraf edib ki, həqiqətən də Abşeron Gənclər Şəhərciyində belə bir problem var: "Olur ki, bir vətəndaşın bildirişi digər vətəndaşın ünvanına göndərilir. Bununla bağlı "Azərsu" ASC-nin əməkdaşları inventarizasiya aparır. Çünki ilkin kodlar açılarkən "Akkord" şirkətinin nümayəndələrinin verdiyi siyahı əsasında kodlaşdırılıb".
"Verilən səhv siyahı bu cür problemin yaranmasına səbəb olub. Vətəndaşlar müraciət etdiyi zaman biz bunları araşdırırıq və yenidən inventarizasiya işləri aparırıq. Bu zaman heç bir şəxsə əlavə və səhvən borc yazılmır. Vətəndaşın öz sayğacının göstəricilərinə uyğun olaraq öz borcunu ödəyir" — Cəbrayıllı bildirib.
Mətbuat xidmətinin rəhbəri vətəndaşlara da müraciət edib: "Bu problemlə qarşılaşan şəxslərin bizə müraciət etməsini xahiş edirik. Bizə müraciət etsələr, problemi tez bir zamanda aradan götürərik".
