BAKI, 8 fev — Sputnik. İranın ən böyük avtomobil istehsalı şirkəti olan "İran Khodro" Azərbaycanla müştərək avtomobil istehsalında maraqlıdır. Bunu "İran Khodro"nun direktoru Haşım Yeke Zare deyib.
"Biz planlaşdırırıq ki, Azərbaycanda müştərək avtomobil istehsalında yatırılacaq sərmayənin 80 faizini Azərbaycan, 20 faizini isə "İran Khodro" təmin etsin. "İran Khodro"nun 20 faiz sərmayəsi əsasən servis və texniki xidmətlər sahəsində olacaq", —deyə Zare bildirib.
Məsələni Sputnik-ə şərh edən iqtisadçı-ekspert Vüqar Bayramov hesab edir ki, müştərək avtomobil istehsalı qısamüddətli dövrdə Azərbaycanın avtomobil bazarına təsir etməyəcək: "Çünki, avtomobil istehsalı, onun bazara çıxarılması zaman alır. Vaxt apardığı üçün çox qısa bir dövrdə istehsal olunmuş avtomobilin bazara çıxması və onun özünə bazar tapması təbii ki, inandırıcı deyil. Amma bütün hallarda yerli istehsalın təşkil edilməsi müsbət haldır. Çünki, bu, istər-istəməz idxaldan asılılığın müəyyən qədər azalmasına gətirib çıxaracaq".
"Əslində daha məqsədəuyğundur ki, Azərbaycan avtomobil istehsalına daha çox inkişaf etmiş ölkələrin brend kompaniyaları ilə başlasın. Məsələn, biz Özbəkistan misalında Yaponiya və Koreya şirkətlərinin bu ölkəyə investisiya qoyduğunu müşahidə etmişik", — ekspert vurğulayıb.
Onun sözlərinə görə, tanınmış və brend şirkətlərin cəlb edilməsi və həmin şirkətlər vasitəsilə istehsalın təşkil edilməsi ixrac imkanlarını da yaratmış olacaq: "İndiki məqamda güman etmirəm ki, Azərbaycan və İran tərəfinin birgə istehsal edəcəyi avtomobillərin dünya bazarına çıxış imkanları var. Bu, indiki məqamda olduqca çətindir. Nəzərə alaq ki, xüsusən də Avropadan nisbətən ucuz və işlənmiş avtomobillər ölkəyə daxil olduğu üçün yerli istehsalın rəqabət aparmaq qabiliyyəti olduqca zəifdir. İran ilə Azərbaycanın müştərək avtomobil istehsalı olarsa, güman olunur ki, ixrac imkanları məhdud olacaq. Amma Azərbaycanda bu tipli istehsalın formalaşması və belə bir istehsalın təşkil edilməsi vacibdir. Çünki, bu, yeni iş yeri yaradacaq. Bu, imkan verəcək ki, idxaldan asılılığı aradan qaldırmaq mümkün olsun. Birmənalı şəkildə belə istehsalın formalaşması müsbətdir".
Ekspert hesab edir ki, böyük ehtimalla İranın "İran Khodro" şirkəti Gəncə maşınqayırma zavodu ilə əməkdaşlıq etmək istəyir: "Əslində, Gəncə maşınqayırma zavodunun imkanları daha genişdir".
"Əmlak Ekspert Mərkəzi"nin direktoru Ramil Osmanlı isə fərqli düşünür. "Naxçıvan Avtomobil zavodu istisna olmaqla, Azərbaycanda avtomobil istehsalı mövcud deyil. Bu baxımdan Azərbaycana istənilən halda investisiya qoyuluşları üçün şərait, zərurət, imkan var", —deyə ekspert Sputnik-ə açıqlamasında bildirib.
Müştərək avtomobil istehsalının səmərə verib-verməyəcəyinə gəldikdə: "Bu, avtomobillərin tipindən, vəziyyətindən, qiymət siyasətindən, onun bazardakı mövqeyindən asılı olacaq. Əgər bu avtomobillər alıcıların maraqlarına cavab verəcəksə, bunun satışını həyata keçirmək mümkün olar".
Qeyd edək ki, Dövlət Gömrük Komitəsinin statistik hesabatına görə, 2015-ci ildə Azərbaycana 26 min 785 avtonəqliyyat vasitəsi idxal edilib. 2014-cü ildə bu rəqəm 63 min 368 ədəd olub.
