BAKI, 14 noyabr - Sputnik. Amerikalı alimlər hesab edirlər ki, Yerin kvazipeyki olan Kamoalev asteroidi meteorit zərbəsi nəticəsində Aydan qopmuş bir fraqment ola bilər.
Bu barədə araşdırmaların nəticələri Communications Earth & Environment jurnalında dərc edilib.
Kvazipeyklər kiçik səma cisimləridir, onlar çox sayda orbital dövrlər ərzində planetin yaxınlığında hərəkət edir. 2016-cı ildə aşkar edilmiş Kamoalev asteroidinin diametri 45-60 metrdir və o, orbitinə görə digər kvazipeyklər arasında ən sabit olanıdır. Ancaq xüsusiyyətlərinə görə bu asteroidi yalnız aprel ayının bir neçə həftəsi zamanı müşahidə etmək mümkündür.
Arizona Universitetinin astronomları müşahidə ediblər ki, Kamoalev asteroidi qırmızı əksetmə spektrinə malikdir. Bu, Apollon missiyalarının Ay səthindən əldə etdiyi mineralların spektrinə çox bənzəyir. Məlumatları təkrar yoxlamaq üçün alimlər dörd il sərf ediblər. Asteroidin analizinin nəticələrindən belə qənaətə gəliblər ki, o, güman ki, Yer-Ay sisteminin bir hissəsi kimi yaranıb. Hesab olunur ki, Kamoalev asteroidi daha böyük səma cisminin Yer və Ayın cazibə qüvvəsinə təsirindən, ya da zərbə nəticəsində yaranıb.
Eləcə də oxuyun:
* Aya uçuşlar hələlik mümkün deyil - NASA
* NASA asteroidlərə qarşı kamikadze aparatını sınaqdan keçirəcək