BAKI, 12 noyabr — Sputnik. Azərbaycanlı rəssam Faiq Əhmədovun yaratdığı xalılar Nyu-Yorkun "Sapar Contemporary" Qalereyasında nümayiş olunub. Fırça ustası özünün fərdi sərgisini "Pir" adlandırıb. Əhmədovun əl işləri artıq ikinci dəfə bu qalereyada sərgilənir. Bu dəfə rəssam üç iri xalı təqdim edib – onlardan hər biri Azərbaycan mədəniyyətinə öz təsirini göstərmiş məşhur şair və mütəfəkkirlər Şəms Təbrizi, Seyid Yəhya əl-Şirvani əl Bakuvi və Nizami Gəncəvinin şərəfinə adlandırılıb.
"Bu adlar təsadüfən seçilməyib. Pir sözü fars, türk və ərəb dillərində sufizmdə ruhani rəhbər, həmçinin, böyük, ağsaqqal mənalarına gəlir, məncə, bütün bu təyinləri adıçəkilən məşhur şəxsiyyətlərə aid etmək olar. Onlar yalnız şair yox, həm də dövrünün alimləri olublar", – deyə Əhmədov bildirib.
Faiq Əhmədov 1982-ci ildə Bakıda anadan olub. 2004-cü ildə Azərbaycan Dövlət Rəssamlıq Akademiyasını Heykəltaraşlıq ixtisası üzrə bitirib. Rəssam Venesiya Biennalesində milli pavilyonda Azərbaycanı təmsil edib.
O, bütün dünyada, xüsusən də, Nyu-York, Paris, London, Berlin, Dubay, Moskvada vaxtaşırı sərgilər keçirir. Faiq Əhmədov 2013-cü ildə Londonun "Viktoriya və Albert" Muzeyindən "Jameel Prize 3" mükafatına namizəd seçilib.
Rəssam Azərbaycan xalçalarının zəngin naxışlarını və dizaynlarını öyrənərək milli mədəniyyətə və rəssamlıq ənənələrinə əsaslanmaqla nadir və müasir incəsənət nümunələri yaradır.
Eləcə də oxuyun:
* Ermənilər İspaniyada Azərbaycan xalçaları nümayiş olunan muzeyə qarşı təxribat törədiblər