BAKI, 9 avqust — Sputnik. Dahi Azərbaycan şairi Nizami Gəncəvinin 880 illiyi münasibətilə Ukraynada nəşr olunmuş "Leyli və Məcnun" kitabı ölkənin bir sıra kitabxanalarına verilib. Sputnik Azərbaycan xəbər verir ki, "Leyli və Məcnun" Ukrayna Mədəniyyət və İnformasiya Siyasəti Nazirliyinin nəzdində Ukrayna Kitab İnstitutunun, Milli Ədəbiyyat Muzeyinin, Milli Yazıçılar Birliyinin, Milli Elmlər Akademiyasının Ukraina Dili İnstitutunun, Şərqşünaslıq İnstitutunun, Milli Parlamentinin və digər qurumların kitabxanalarına yerləşdirilib.
Dahi Azərbaycan şairi Nizami Gəncəvinin Ukraynada nəşr olunmuş bu bənzərsiz poeması ümumiyyətlə ölkənin 20-yə yaxın kitabxanasında oxuculara təqdim olunacaq.
Xatırladaq ki, dünya ədəbiyyatının görkəmli nümayəndəsi, dahi Azərbaycan şairi və mütəfəkkiri Nizami Gəncəvinin anadan olmasının 880 illiyi münasibəti ilə Prezident İlham Əliyev Azərbaycan Respublikasında 2021-ci ilin "Nizami Gəncəvi İli" elan edilməsi haqqında Sərəncam imzalayıb. 2021-ci ilin "Nizami Gəncəvi İli" elan olunması təkcə Nizami yaradıcılığına, ədəbiyyata deyil, ümumilikdə mədəniyyətə, Azərbaycana və sivilizasiyaya verilən dəyərdir.
"Nizami Gəncəvi İli"nin elan olunmasında məqsəd, Azərbaycanın dahi şair və mütəfəkkiri Nizami Gəncəvinin irsini dünya ictimaiyyətinə daha yaxından tanıtmaq, eyni zamanda, Nizami irsinin rolunu araşdırmaqdır.
Məlumat üçün bildirək ki, Nizaminin "Leyli və Məcnun" əsəri "Xəmsə" toplusuna daxil olan üçüncü poemadır. Əsər 1188-ci ildə fars dilində yazılıb. Nizami bu əsəri Şirvanşah I Axsitana (1160-1197) ithaf edib. Əsərin süjetinin əsasında sonradan "Məcnun" (dəli) adlandırılan gənc Qeys və gözəl Leylinin nakam eşqindən bəhs edən qədim dastan dayanır. 4600 beytdən ibarət olan poema "Leyli və Məcnun" haqqında dastanın fars dilində yazılmış ən məşhur variantıdır. Nizami "Leyli və Məcnun" haqqında xalq dastanını yazılı ədəbiyyata gətirən ilk şairdir.
Həmçinin oxuyun:
"Xosrov və Şirin" bədii serialında nələr olacaq
Nizami Gəncəviyə həsr olunmuş xalça eskizi müsabiqəsinin qalibləri müəyyənləşib
Milli Kitabxana Nizami Gəncəvi haqqında elektron xülasə hazırlayıb