BAKI, 1 may — Sputnik. Maradonanın ölümünü araşdıran heyət əfsanəvi futbolçuya yetərsiz tibbi xidmət göstərildiyi və onun həyatının taleyin ümidinə buraxıldığı nəticəsinə gəlib. Sputnik Azərbaycan xəbər verir ki, Argentinanın rəsmi xəbər agentliyi TELAM-da yayılan xəbərə görə, San İsidro Prokurorluğunun Maradonanın ölümü ilə bağlı başlatdığı araşdırmalar nəticəsində hazırlanan hesabatda futbolçunun uyğun şərtlər altında xəstəxanada qaldığı təqdirdə daha uzun müddət yaşaya biləcəyi ehtimalı ifadə edilib.
Hesabatda əfsanəvi futbolçunun ölümünə səbəb olmaqda ittiham edilən həkimlərlə bağlı da məsələlərə yer verilib. Göstərilib ki, Maradonaya qulluq edən tibb işçiləri laqeydlik göstərərək ona yetərli xidmət etməyib, taleyin ümidinə buraxıblar. Sənəddə futbolçunun ölməzdən 12 saat əvvəl əzab çəkməyə başladığı, ancaq bunun müqabilində uyğun şəkildə nəzarət edilmədiyi və həyatı üçün təhlükə yaradan göstəricilərə laqeyd yanaşıldığı qeyd olunub.
Ötən il noyabrın 3-də beyin əməliyyatı üçün xəstəxanaya aparılan futbolçunun əqli sağlamlığının qaydasında olmaması və öz sağlamlığı haqqında qərar verə biləcək vəziyyətdə olmadığı da hesabatda göstərilib.
Qeyd edək ki, hazırda 9 nəfər Maradonanın ölümünə səbəb olmaqda ittiham edilir.
Futbol tarixinin ən yaxşı oyunçularından hesab edilən Maradona ötən il noyabrın 20-də 60 yaşında həyata gözlərini yummuşdu. Mərhumun ölüm səbəbi kimi xroniki ürək çatışmazlığına bağlı ağciyər ödəmi olduğu bildirilmişdi.
