Eldar Tanrıverdiyev, Sputnik Azərbaycan
BAKI, 22 iyul — Sputnik. Bu gün Türkiyə Prezidenti Rəcəb Tayyib Ərdoğanın rəhbərliyi ilə Türkiyə Milli Təhlükəsizlik Şurasının iclası keçiriləcək. Sputnik Azərbaycan xəbər verir ki, iclas Bakı vaxtı ilə saat 16:00-da baş tutacaq.
Məlumata əsasən, digər məsələlərlə yanaşı iclas zamanı Ermənistan və Azərbaycan arasında baş verən qarşıdurmalar zamanı Türkiyənin Azərbaycana verəcəyi dəstək müzakirə olunacaq.
Şuranın iclasının əsas gündəmi isə Liviya və Suriyada baş verən son hadisələr olacaq.
Bundan əlavə, Şura üzvləri İraqın şimalında davam edən "Pəncə-Kaplan" əməliyyatı, ölkə daxilində başladılan "İldırım" əməliyyatı, FETÖ ilə mübarizədə son vəziyyət də müzakirə ediləcək.
Qeyd edək ki, ötən gün Türkiyə prezidenti Rəcəb Tayyib Ərdoğan Azərbaycan və Ermənistan arasında qarşıdurma ilə bağlı bəyanat verib: “Ermənistanın hücumları qarşısında Azərbaycanı heç vaxt yalnız qoymadıq, qoymayacağıq da".
Xatırladaq ki, İyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutublar. Daha sonra Azərbaycan tərəfi cavab tədbirləri görüb. Nəticədə hər iki tərəf itki verib.
