Kamal Almuradlı, Sputnik Azərbaycan
BAKI, 10 aprel — Sputnik. May ayında bərpası gözlənilən futbol üzrə Almaniya çempionatlarının keçirilmə şərtləri bəlli olub. Sputnik Azərbaycan xəbər verir ki, bununla bağlı detalları “Bild” nəşri açıqlayıb.
Məlumata görə, ilkin mərhələdə çempionatın 30 iyunda başa çatdırılması nəzərdə tutulub. Bundesliqa hətta oyunların apreldə bərpası ilə bağlı optimal variant da irəli sürüb. Birinci və ikinci bundesliqada çıxış edən 36 klubun hamısı çempionatın bərpası ilə bağlı şərtlərlə məlumatlandırılıblar.
Qeyd olunur ki, hər şeydən əvvəl oyunlar azarkeşsiz keçiriləcək. Matçlara buraxılacaq şəxslərin sayı 239 nəfərdən çox olmamaqla qəti müəyyənləşdirilib. Bu siyahıya ilkin olaraq 4 hakim, 40 futbolçu, 16 məşqçi, 3 anditopinq əməkdaşı, 6 tibb işçisi, 5 fotoqraf, 10 təhlükəsizlik xidməti əməkdaşı, 36 TV işçisi daxildir. Bundan başqa, stadionun ərazisində 50 mühafizəçi xidmət edəcək.
Klub nümayəndələri və fəxri qonaqlar da daxil olmaqla ümumi say 239 nəfərdən çox olmamalıdır.
Xatırladaq ki, birinci Bundesliqada 25 tur oynanılıb. Çempionatın başa çatmasına 9 tur qalıb.
İspaniya La liqası da çempionatın başlaması ilə bağlı müzakirələrə start verib. Federasiya rəhbəri Xavyer Tebas açıqlamasında bildirib ki, yaxşı halda 28 may tarixində yaşıl meydanlara qayıtmaq mümkündür. Bundan öncə 26 apreldə məşqlərə start verilməsi nəzərdə tutulur.
Federasiya rəhbərinin açıqlamasına görə, əgər çempionat başlamasa, bu, klublar üçün faciə olacaq. Belə ki, klublar 1 milyard avro ziyana düşəcək.
