BAKI, 17 mart - Sputnik. Mart ayına nəzərdə tutulmuş AVRO 2020-nin pley-off oyunları və yoldaşlıq görüşləri iyunun əvvəlinə keçirilib. Bu barədə Sputnik Azərbaycan UEFA-ya istinadən məlumat verir.
UEFA martın 17-də məlumat yayıb ki, koronavirusla bağlı vəziyyətə görə AVRO 2020 12 ay təxirə salınır və 2021-ci il iyunun 11-dən iyulun 11-dək keçiriləcək.
"AVRO 2020-nin final mərhələsinə çıxmaq uğrunda pley-off oyunları və martın sonuna planlaşdırılan beynəlxalq yoldaşlıq görüşləri 2020-ci il iyunun əvvəlində keçiriləcək", – məlumatda deyilir.
Avropa çempionatına çıxmaq uğrunda yarımfinallarda oynayacaqlar:
А yolu
İslandiya - Rumıniya
Macarıstan - Bolqarıstan
В yolu
Bosniya və Herseqovina - Şimali İrlandiya
Slovakiya - İrlandiya
С yolu
Şotlandiya - İsrail
Norveç - Serbiya
D yolu
Gürcüstan - Belarus
Şimali Makedoniya - Kosovo
Ümumdünya Səhiyyə Təşkilatı (ÜST) fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib. Dünyada bu virusa yoluxanların sayı 182 mini, ölənlərin sayı isə 7 mini keçib.
