BAKI, 20 dekabr — Sputnik. Müasir dövrün ən gözəl qadınlarından biri, Oskar mükafatının qalibi Şarliz Teron "NPR" telekanalına müsahibəsində anasının özünü və qızını qorumaq üçün atasını necə güllələməsindən danışıb. Sputnik Azərbaycan xəbər verir ki, KİV-in aktrisanın həyatında olan bu epizoddan məlumatları var, lakin aktrisa ilk dəfə hadisənin təfərrüatlarını açıqlayıb.
Hadisə 28 il əvvəl, Şarlizin 15 yaşı olarkən baş verib. Aktrisanın uşaqlıq illəri Cənubi Afrika Respublikasının paytaxtı Yohannesburq yaxınlığında yerləşən fermada keçib. Aktrisanın atası alkoqolizmdən əziyyət çəkib. Bir dəfə o içkili vəziyyətdə evə gəlib və içəridə həyat yoldaşının və xanımının olduğu otağın qapısına bir neçə dəfə atəş açaraq daxil olub. Aktrisa bu güllələrdən heç birinin ailə üzvlərinə dəyməməsini sadəcə möcüzə adlandırıb.
"Mən anamla mənim otağımda idim, o zorla içəriyə daxil olmağa çalışırdı, biz isə qapını bağlamağa cəhd edirdik. O, bir addım geri çəkildi və qapıya üç dəfə atəş açdı. Güllələrin bizə dəyməməsi möcüzə idi. Sonra anam atəş açdı və nöqtəni qoydu", - deyə Şarliz Teron bildirib.
Onun sözlərinə görə, atası xəstə adam olub, onun hərəkətlərini heç vaxt proqnozlaşdırmaq mümkün olmayıb.
Qeyd edək ki, hadisə baş verəndən sonra polis Şarliz Teronun anasına qarşı ittiham irəli sürməyib və onun törətdiyi qətli özünümüdafiə kimi dəyərləndirib.
"Bu barədə danışmağa utanmıram. Hesab edirəm ki, zorakılıq problemi barədə daha tez-tez danışmaq lazımdır. Beləcə biz yalnız olmadığımızı anlayırıq", - deyə 44 ytaşlı aktrisa bildirib.
O, həmçinin müsahibəsində bildirib ki, aktrisa karyerasının başlanğıcında rejissor tərəfindən seksual təzyiqə məruz qalıb.
