BAKI, 21 noyabr — Sputnik. Alimlər araşdırma apararaq müəyyən edib ki, qədim Misir fironu Tutanhamon qan zəhərlənməsindən ölüb. Sputnik Azərbaycan xarici mətbuata istinadla xəbər verir ki, o ayağından zədə aldıqdan sonra qanı zəhərlənib.
Yerli arxeoloq Zaxi Havass jurnalistlərə açıqlamasında deyib ki, rəhbərin ölüm səbəbi hələ tam aydın deyil. Çünki onun bədənindəki yaralar həm bədbəxt hadisə, həm də qəsd ola bilər.
Eyni zamanda araşdırmaçı ehtimal edir ki, Tutanhamon arabadan yıxılıb və ayağını qırıb. Bir müddət sonra isə o yarasına infeksiya düşdüyü üçün ölüb.
Alimlərin fikrincə, bu fərziyyə fironun DNT-sinin son təhlilləri ilə də təsdiqlənir.
"Tezliklə biz biləcəyik ki, onda infeksiya olub, yoxsa yox. Əgər olubsa, bu onun bədbəxt hadisə nəticəsində öldüyünü təsdiq edəcək", – deyə arxeoloq vurğulayıb.
Araşdırmanın nəticəsini alimlər 2020-ci ildə açıqlayacaq.
