BAKI, 1 noyabr — Sputnik. Bakı Nəqliyyat Agentliyi (BNA) ictimai nəqliyyatda gedişhaqlarının artırılacağı ilə bağlı səslənən fikirlərə münasibət bildirib.
Sputnik Azərbaycan-ın məlumatına görə, Bakı Nəqliyyat Agentliyinin mətbuat xidmətinin rəhbəri Mais Ağayev bununla bağlı rəsmi açıqlama yayıb. Açıqlamada qeyd olunur ki, ötən gün Xəzər TV-də yayımlanan "Hər şey daxil" proqramında M.Ağayev kart sisteminə keçid tam başa çatandan sonra gediş haqqının ödənilməsində müəyyən fərqliliklərin ola biləcəyini deyib: "Yəni ortada hələ konkret nəsə yoxdur, sadəcə, fikir olaraq söylənilib bu məsələ.
Bir gün sonra bəzi KİV-lər bu açıqlamaya istinad edərək guya marşrut avtobuslarında gediş haqqının artacağı ilə bağlı məlumatlar yayıblar. Qiymət artımı olacağı ilə bağlı əsası olmayan bu məsələ insanlar arasında ciddi narahatlığa səbəb olub. Bildirirəm ki, heç bir qiymət artımından söhbət getmir.
Digər yandan, qiymət tənzimlənməsi BNA yox, digər müvafiq qurum tərəfindən həyata keçirilir. Efirdə səslənən fikirlərin izahına gəlincə bildirim ki, məsələn, Türkiyənin İzmir şəhərində səhər 06:00-07:00, axşam 19:00-20:00 arasında ictimai nəqliyyatda tariflər 50 faiz azaldılır. Bu ildən tətbiq edilən bu təcrübənin məqsədi pik saatlarda daha çox insanın məhz ictimai nəqliyyatdan istifadəsinə nail olmaqdır. Bizim də məqsədimiz insanların ictimai nəqliyyatdan istifadəsini stimullaşdıran bu cür təcrübələrdən istifadə etməkdir. Bir daha qeyd edirəm - qiymətlərin artacağı ilə bağlı səslənən fikirlər yalandır".
