BAKI, 28 oktyabr — Sputnik. Kişi boksçulardan ibarət Azərbaycan yığmasında yeni baş məşqçi təyinatı rəsmiləşib. Milli komanda kubalı Umberto Orta Dominqezə həvalə edilib.
![Azərbaycan yığmasında baş məşqçi təyinatı olub Azərbaycan yığmasında baş məşqçi təyinatı olub - Sputnik Azərbaycan](https://cdnn1.img.sputnik.az/img/42216/07/422160777_0:0:741:480_600x0_80_0_0_4ba07d8bc8753eb66ce71f9ccd470139.jpg)
Sputnik Azərbaycan Azərbaycan Boks Federasiyasının rəsmi saytına istinadən xəbər verir ki, 53 yaşlı mütəxəssislə 1 illik müqavilə imzalanıb. O, bu postda baş məşqçi vəzifəsini icra edən Nəriman Abdullayevi əvəzləyib.
Umberto Orta 1966-cı ildə Kubanın Kamaquey şəhərində anadan olub. 1984-cü ildə ölkəsində Bədən Tərbiyəsi İnstitutunu bitirən mütəxəssis boks məşqçisi ixtisasına yiyələnib.
O, 1984-1992-ci illərdə Kamaqueyin idman məktəbində boks müəllimi işləyib. U.Ortanın ardınca yığma karyerası başlayıb. Kubanın yeniyetmələrdən və gənclərdən ibarət yığmalarında çalışan mütəxəssis 1992-2005-ci illərdə məşqçi, növbəti 11 ildə baş məşqçi kimi işləyib. Mütəxəssis bu müddətdə 18 dünya birinciliyi, 1 dünya çempionatı, 2 Yeniyetmələrin Yay Olimpiya Oyunlarına komanda çıxarıb. Onun yetirmələri dünya birinciliklərində 80, Olimpiadalarda 9 qızıl medal qazanıb.
London-2012 və Rio-2016 Yay Olimpiya Oyunlarında Kubanı təmsil edən 10 boksçudan 9-u müxtəlif yaş qruplarında U.Ortanın rəhbərliyi altında çalışıblar. 2016-cı ilin oktyabrında mütəxəssis Rusiya yığmasına məşqçi təyin olunub. O, 1 il burda işlədikdən sonra qonşu ölkədə fəaliyyətini klubda davam etdirib.
Qeyd edək ki, Nəriman Abdullayev isə əvvəlki kimi, yenə böyük məşqçi funksiyasını yerinə yetirəcək.