İlham Əhmədov, Sputnik Azərbaycan
BAKI, 5 oktyabr — Sputnik. İsmayıllı rayon sakini Əli İmamverdiyev velosipedə olan marağı ilə hamıdan fərqlənir.
İki metr hündürlüyü olan velosipeddə rahatlıqla hərəkət edən Əli Sputnik Azərbaycan-ın bölgə müxbiri ilə söhbətində bu modelin necə başa gəldiyini belə izah etdi: "Bir gün Rusiya telekanallarından birinə baxırdım və təsadüfən velosipedlər haqda verilişə rast gəldim. Oradakı müxtəlif, qeyri-adi velosipedlər xoşuma gəldi, xəyalımda canlandırdığım modeli necə hazırlaya biləcəyim haqda fikirlər formalaşmağa başladı. Beləliklə, sabahı gündən dostlarımla götür-qoy edib işə başladım. Ümumilikdə bu velosipedin hazırlanmasına yeddi günüm getdi və məncə, əziyyətimə dəydi".
Əlinin velosipedinin ümumi hündürlüyü iki metrdir. Onun hazırlanmasında iki təkər, iki karkas ("rama"), üç çarx, oturacaq, pedallar və iki zəncirdən istifadə olunub.
Əlbəttə, bu hündürlükdə velosipedi görənlər marağını gizlədə bilmir və Əliyə yaxınlaşaraq onu haradan aldığını soruşurlar. Hətta bu cür velosiped üçün sifariş verənlər də var. İxtiraçı gələcəkdə velosipedə sürət qutusu qoyacağını və digər yeniliklər etmək istədiyini də bildirir.
Qeyd edək ki, dünyada ən böyük velosipedin hündürlüyü 5 m 40 sm-dir. Necə deyərlər, hər kəsin öz zövqü.
