BAKI, 19 sentyabr — Sputnik. Ermənistanda yüksək vəzifəli məmurların istefaya göndərilməsi davam edəcək. Sputnik Ermənistan xəbər verir ki, bu barədə "Joxovurd" qəzeti məlumat yayıb.
Məlumata əsasən, yaxın zamanda Ermənistan Baş nazirinin müavini Mqer Qriqoryan, Xarici İşlər naziri Zöhrab Mnasakanyan, Müdafiə naziri David Tonoyan da istefaya göndəriləcək.
Nəşr eyni zamanda istefaya göndəriləcək məmurlar siyahısında ölkənin maliyyə naziri, iqtisadiyyat naziri, eləcə də dövlət gəlirləri üzrə komitənin rəhbərinin də adlarını çəkib: "Baş nazir Nikol Paşinyan ABŞ-dan qayıtdıqdan sonra Səhiyyə naziri Arsen Torosyanı və Əmək və sosial məsələlər üzrə nazir Zauri Batoyanı vəzifədən azad etmək niyyətindədir".
Xatırladaq ki, sentyabrın 16-da Milli təhlükəsizlik xidmətinin direktoru Artur Vanesyan, sentyabrın 18-də Ermənistan polisinin rəisi Valeri Osipyan istefa verib. Nikol Paşinyan daha sonra Osipyanı özünə müşavir təyin edib.
