Eldar Tanrıverdiyev, Sputnik Azərbaycan
BAKI, 10 avqust — Sputnik. Artıq bir neçə gündür ki, Türkiyədə ömürlük həbs cəzası çəkən Kürdüstan Fəhlə Partiyasının (PKK) lideri Abdullah Öcalan sensasion bəyanatı müzakirə olunur.
Terror təşkilatının lideri vəkilləri vasitəsilə yayımladığı bəyanatında kürd yaraqlıları və Türkiyə arasında silahlı münaqişəni dayandırmağa hazır olduğunu bildirib.
PKK liderinin bu bəyanatı Türkiyədə bir mənalı olaraq qarşılanmayıb və geniş müzakirələrə səbəb olub.
Sputnik Azərbaycan qardaş ölkədə baş verənlər barədə türkiyəli professor, Anadolu Aydınlar Ocağının sədri İbrahim Öztəkin fikirlərini öyrənib.
Türkiyəli professor qeyd edib ki, 30 ildən artıq müddətdən bəri türk millətinə qarşı əli qanlı, bir uşaq qatili kimi hərəkət edən Abdullah Öcalan, həbs olunub gətirildiyindən gündən Türkiyəyə xidmət etmək istəyir: "Buna icazə verin demək istəyir. Yüksək təhlükəsizlik şəraitində həbsdə saxlanılan bu şəxs Türkiyə ilə terror qruplaşmaları arasında vasitəçi olmaq gücünü haradan alır? O kukla idi və onun missiyası bitdi. Görəsən PKK və onu dəstəkləyən qruplar üçün bu gün Öcalan kimdir və hansı sifətdədir? O, öz ağlınca vasitəçilik edəcək və özünə divident qazanacaq. Türkiyə dövləti daha öncə bu terrorçu üzərindən bir qədər səmərə əldə elə biləcəyini düşündü. Fəqət nə oldu? Şəhərlərimizdə terror təşkilatı tərəfindən terror aktları törədildi".
Aydınlar Ocağının sədri xartladıb ki, terrorçudan heç bir vaxt kömək ummazlar: "İlan ilandır və onun işi hər zaman çalmaqdır. Bu cani heç bir vaxt Türkiyə Cümhuriyyəti tərəfindən tərəf kimi qəbul oluna bilməz. Terroru bitirmə səlahiyyətinə və gücünə sahib olan, terror bitirsin. Terroru bitirəcək şəxsə kimsə bu terror niyə bitirdin deməz!".
İbrahim Öztək vurğulayıb ki, Türkiyə dövləti bu gün, Suriyanın şimalının böyük bir hissəsini kürdlər vasitəsilə rəsmən işğal etmiş və PKK, PYD, YPG kimi terror ünsürlərinə təlim keçən, silahlandıran ABŞ-la qarşı-qarşıyadır: "Birləşmiş Ştatların Suriyada fəaliyyəti Türkiyə üçün təhdiddir. Suriyada ABŞ-ın aktivliyi və gücü Türkiyəni iqtisadi olaraq təzyiq altına almağı, şantaj ünsürləri isə Türkiyəyə baha nə sata bilirəm fikrinə xidmət edir. Təsadüfü deyil ki, son Yaponiya görüşündə Birləşmiş Ştatlar prezidenti Tramp "S-400", "F-35" kimi məsələlər deyərkən, 100 ədəd "Boeing" satmış bir tacirdir. Öcalanın son çıxışı da, görəsən özümə bir pay qopara bilərəmmi kimi xəyaldır".
Aydınlar Ocağının sədrinin sözlərinə görə, Türkiyənin 8-9 il öncə Fərat çayının şərqinin formalaşdırılması prosesində səhvləri olub: "Terror ünsürlərindən istifadə edərək Birləşmiş Ştatların formalaşdığı Rojovo dəhlizini, ABŞ maraqlarının Aralıq dənizinə dair maraqlarını vaxtında hesablaya bilmədik. İndi biz görürük ki, Birləşmiş Ştatlar üçün on baza qurduğu Suriya torpağından daha çox dəniz əhəmiyyətlidir. Çünki dünyanın ən böyük neft-qaz yataqları Aralıq dənizi və Kipr adası ətrafındadır. ABŞ indi də boş durmayacaq, bu səfər İsrail, yunanlarla bir araya gələrək Türkiyəni sıxışdıracaq. İllər öncə dediyim kimi Yaxın Şərqdə 100 il daha neftin qiyməti qanla ödənəcək".
