BAKI, 5 avqust — Sputnik. Bu gün UEFA-nın Nyondakı qərargahında Çempionlar Liqasının pley-off mərhələsinin püşkü atılıb.
Sputnik Azərbaycan xəbər verir ki, 3-cü mərhələdə mübarizə aparacaq APOEL - "Qarabağ" cütünün qalibinin potensial rəqibləri müəyyənləşib.
"Qarabağ" qalib gələrsə, növbəti mərhələdə PAOK (Yunanıstan) - "Ayaks" (Hollandiya) cütünün qalibi ilə qarşılaşacaq. Pley-offun ilk oyunu Bakıda keçiriləcək.
Çempionlar Liqasının pley-off mərhələsinin oyunları avqustun 20-21-də və 27-28-də baş tutacaq.
"Qarabağ" Çempionlar Liqasının 3-cü təsnifat mərhələsində APOEL səddini keçə bilməsə, yoluna Avropa Liqasında davam edəcək.
Qurban Qurbanovun komandası Kipr klubuna məğlub olsa, Avroliqanın pley-off mərhələsində "Sutyeska" (Çernoqoriya) - "Linfild" (Şimali İrlandiya) cütünün qalibi ilə qarşılaşacaq. "Qarabağ" Avroliqaya düşsə, ilk oyununu səfərdə keçirəcək.
Avroliqadakı digər təmsilçisimiz "Neftçi"nin də pley-offdakı potensial rəqibi məlum olub.
"Ağ-qaralar" 3-cü mərhələdə İsrailin "Bney Yehuda" klubunu mübarizədən kənarlaşdırarsa, pley-offda "Malmö" (İsveç) - "Jrinski" (Bosniya və Herseqovina) cütünün qalibi ilə qarşılaşacaq.
Qeyd edək ki, Avropa Liqasında pley-off mərhələsinin oyunları avqustun 22-də və 29-da keçiriləcək.
