BAKI, 23 iyun - Sputnik. Ehtiyatlı olun və Gürcüstan üçün bu mürəkkəb dövrdə səhv etməyin. Sputnik Gürcüstan-ın məlumatına əsasən, Gürcüstanın Katolikos-Patriarxı II İliya xalqa müraciətində bu sözləri işlədib.
"Biz çox mürəkkəb dövrdə yaşayırıq, ətrafımızda xoşagəlməz hadisələr baş verir, ona görə də sizə xahişlə müraciət etmək istəyirəm - ehtiyatlı olun və səhv etməyin. Ümid edirəm, Tanrı bizə öz lütfünü göstərəcək və sülh verəcək. Siz bilirsinizi ki, Müqəddəs Məryəm Gürcüstanı himayə edir, Gürcüstanı xüsusilə qoruyur", - II İliya bildirib.
Qeyd edək ki, Rusiya Dumasının üzvlərinin Tbilisidə beynəlxalq tədbirdə iştirak etməsi və PPA-nın prezidenti Sergey Qavrilovun Gürcüstan parlamenti sədrinin kürsüsündə əyləşməsi gürcü ictimaiyyəti arasında böyük narazılıq yaradıb.
Bunun ardınca başlayan etiraz aksiyaları nəticəsində Gürcüstan parlamentinin sədri İrakli Kobaxidze istefa verib. 300-dən artıq etirazçı isə saxlanılıb. Onlardan 28-i hələ də həbsxanadadır. İndi etirazçılar daxili işlər naziri Georgi Qaxariyanın istefasını və yeni parlament seçkilərinin keçirilməsini tələb edirlər.
