BAKI, 2 may — Sputnik. Vəhşi qabanlar Slovakiyanın Livaka kəndi yaxınlığında XVI əsrin əvvəllərində yerə basdırılmış qızıl xəzinəsi tapıblar. Sputnik Azərbaycan xəbər verir ki, bu barədə məlumatı Ridus nəşri yayıb.
O vaxtlar Macar krallığının torpaqlarında hakimiyyət uğrunda mübarizə gedib və ola bilsin, tapılmış xəzinəni zadəganlardan biri basdırıb. Tapılmiş kisədə külli miqdarda vəsait olub.
Qabanların torpağı eşib üzə çıxardığı xəzinəni meşədə gəzintiyə çıxan cütlük tapıb. Onlar dərhal Arxeologiya İnstitutuna müraciət edərək mütəxəssisləri hadisə yerinə dəvət ediblər.
"Bu unikal kəşfdir: bizə xəzinəni yerindəcə sənədləşdirməyə imkan verildi. O, vəhşi qabanlar tərəfindən heç bir müdaxiləyə məruz qalmamışdı. İşlədiyim illər ərzində mən bir dəfə də olsun, belə bir xəzinəyə rast gəlməmişəm və bu, sözsüz ki, indiki zamanda ən gözəl tapıntıdır" - deyə tədqiqatın rəhbəri Martin Furman bildirib.
Arxeoloqlar, demək olar ki, həmin ərazidə cəmi iki kvadratmetrlik ərazini tədqiq ediblər və oradan gil küpün qalıqlarını tapıblar. Orada, həmçinin 500-600 il əvvələ aid 1867 gümüş sikkə aşkarlanıb. Alimlərin sözlərinə görə, bu həcmdə sikkələr həmin zamanlarda əhəmiyyətli miqdar idi. Misal üçün, adi işçinin günlük qazancı o vaxtlar, təqribən 6-10 gümüş sikkə olub, qızıl sikkələrin üzünü isə adi adamlar heç vaxt görməyiblər.
Tədqiqatçılar ehtimal edirlər ki, xəzinəni varlı bir tacir, ya da krala yaxın adamlardan biri bura basdırmış ola bilər. Sahibi pulları kisəyə yığaraq küpün içinə qoyub və meşədə basdırıb. Xəzinəninin basdırıldığı quyu elə də dərin deyil. Ekspertlər hesab edirlər ki, xəzinənin sahibi onu tələsik basdırıb.
Bununla yanaşı, arxeoloqlar hesab edirlər ki, tapıntı 1527-ci ildə Likava qalasının yanması ilə də əlaqədar ola bilər. Mümkündür ki, əvvəllər bu xəzinə qalada saxlanılırmış və yanğın zamanı tələsik oradan çıxarılaraq başqalarının əlinə keçməməsi üçün meşədə basdırılıb.
Hazırda alimlər sikkələrin təmizlənməsi ilə məşğuldurlar. Bundan sonra xəzinə Rujomberok şəhərindəki Liptov regon muzeyinə veriləcək. O da maraqlıdır ki, Slovakiya qanunlarına görə, xəzinəni tapan cütlük arxeoloqlara dərhal məlumat verdikləri üçün külli miqdarda mükafat alacaqlar.
