BAKI, 11 aprel — Sputnik. Bu ilin yayında Belarusun paytaxtı Minskdə 2-ci Avropa Oyunlarına və payızda Amerika Birləşmiş Ştatlarının San Dieqo şəhərində ANOC Dünya Çimərlik Oyunlarına vəsiqə qazanan Azərbaycan karateçilərinin adları açıqlanıb.
Karate Federasiyasından Sputnik Azərbaycan-a verilən məlumata görə, 21-30 iyun tarixlərində 50 ölkədən 4000-dən artıq idmançının 15 növ üzrə mübarizə aparacağı yarışda 6 karateçimiz iştirak edəcək. Kumite turnirində Azərbaycanı Firdovsi Fərzəliyev (-60 kq), Rafael Ağayev (+75 kq), Asiman Qurbanlı (+84 kq) eləcə də Nuranə Əliyeva (-50 kq) və İrina Zaretska (-68 kq), kata yarışlarında isə Roman Heydərli təmsil edəcək. Qeyd edək ki, karateçilərimiz əsasən ötən günlərdə İspaniyada son qitə çempionatında qazandıqları reytinq xalları ilə Avropa Oyunlarında iştirak etmək hüququ qazanıblar. 2-ci Avropa Oyunlarının karate yarışları 29-30 iyun tarixlərində Minskin Çijovka-Arena kompleksində keçiriləcək.
Son Avropa üçüncüsü Roman Heydərovun nəticəsi ona həm də ANOC Dünya Çimərlik Oyunlarında ölkəmizi təmsil etmək şansı verib. San Dieqoda 9-15 oktyabr tarixlərində mötəbər yarışın karate turniri isə 10-11 oktyabrda keçiriləcək.
