Təranə Xudabaxşiyeva, Sputnik Azərbaycan
BAKI, 4 mart — Sputnik. Azərbaycanda keçmiş voleybolçu və məşqçi Ziya Rəcəbov tərəfindən voleybol üzrə idman akademiyası yaradılıb. Bu barədə Sputnik Azərbaycan-a Ziya Rəcəbov özü məlumat verib.
O deyib ki, 14 ay işsiz qalandan sonra bu qərara gəlib: "Gördüm ki, normal təklif yoxdur, həm də federasiyada vəziyyət günü-gündən pisləşir, qərara gəldim ki, uşaq voleybol komandası yaradım. Akademiya İdman Akademiyasında fəaliyyət göstərir. İstər oğlan, istərsə də 8-14 yaşlı qızlar akademiyaya dəvət olunur".
"Kimdə potensial varsa, çalışacağıq ki, üzə çıxaraq. Məqsədimiz voleybol üzrə milli komandamız üçün azərbaycanlı idmançılar yetişdirməkdir” - deyə məşqçi qeyd edib.
Qeyd edək ki, Ziya Rəcəbov 2015-2016-cı illərdə qadınlardan ibarət "Azəryol" komandasında ilk öncə ikinci məşqçi, daha sonra isə baş məşqçi vəzifələrində çalışıb. Eyni zamanda kişilərdən ibarət Milli yığma komandanın da köməkçi məşqçisi vəzifəsini icra edib. 2017-ci ildə 4 ay "Neftçi" kişi voleybol klubunun baş məşqçisi olub. “Neftçi”dən ayrılandan sonra isə işsiz qalıb.
