Nigar Məhərrəm, Sputnik Azərbaycan.
BAKI, 4 fevral — Sputnik. Türkiyədə ötən il xəstələrin daha çox siqaret əleyhinə olan dərmanlara tələbatı artıb. Ölkədə bu zərərli vərdişdən xilas olmaq üçün istifadə olunan dərmanların pulsuz verilməsinə baxmayaraq, Prezident Ərdoğan tərəfindən yeni bir qərar da imzalanıb.
Belə ki, 300 min nəfərədək belə xəstə ölkənin Səhiyyə Nazirliyi tərəfindən pulsuz müalicə ediləcək. Həmçinin, həmin xəstələr bahalı dərmanlarla da pulsuz təmin olunacaqlar.
Nəzərə alaq ki, Azərbaycanda da tütündən istifadə ilə bağlı rəqəmlər heç də ürəkaçan deyil. Dünyada tütündən istifadə ilə bağlı xəritə hazırlayan tobaccoatlas.org-un 2015-ci ili əhatə edən son statistikasına görə, ölkəmizdə siqaret çəkənlərin 46.5 faizi yaşı 18-dən yuxarı olanlar, 2.16 faizi isə 10-14 yaşlı yeniyetmə oğlan uşaqlarıdır.
Sputnik Azərbaycan-ın əməkdaşı problemin aktuallığını nəzərə alaraq Azərbaycanda siqaret əleyhinə mübarizənin necə təşkil edildiyini araşdırdı, Türkiyədə reallaşan bənzər proqramların ölkəmizdə tətbiq olunub-olunmadığına aydınlıq gətirməyə çalışdı.
Səhiyyə Nazirliyi və onun nəzdində fəaliyyət göstərən İctimai Səhiyyə və İslahatlar Mərkəzindən əldə etdiyimiz məlumata görə, Azərbaycanda belə bir proqram həyata keçirilmir. Nazirlikdən verilən məlumatda, həmçinin bu cür dərmanlara tələbatla bağlı əllərində statistika olmadığı bildirildi.
Hazırda siqaret əleyhinə olan dərmanlara tələbatın nə qədər olduğunu öyrənmək üçün bir neçə dərman idxalçısı ilə əlaqə saxladıq. Belə məşhur firmalardan birindən sorğumuza cavab olaraq qeyd edildi ki, 2017-ci ildə siqaret əleyhinə olan vasitələrin ümumi satış sayı 3944 qutu, 2018-ci ildə isə 6693 qutu olub.
Millət vəkili Fazil Mustafa isə son illərdə ölkəmizdə tütün və narkomaniya ilə bağlı rəqəmlərinin artdığına diqqət çəkərək bu cür proqramların Azərbaycanda da hazırlanmasının vacibliyini bildirdi: "Azərbaycanda bu istiqamətdə hansısa işlərin görülməsini söyləməkdə çətinlik çəkirəm. Çünki ölkəmizdə bu cür dərmanların tapılmasında müəyyən problemlər mövcuddur".
"Düşünürəm ki, ölkəmizdə də bənzər proqramların tətbiqinə ehtiyac var. Lakin təəssüflər olsun ki, Türkiyədən fərqli olaraq Azərbaycanda hələ ki, bu məsələyə ciddi yanaşmanın sərgilənməsi müşahidə edilmir" – deyə deputat vurğuladı.
Millət vəkilinin sözlərinə görə, bənzər proqramların hazırlanaraq tətbiq olunması həm də vətəndaşın yükünün azalması deməkdir.
F.Mustafa son bir neçə ayda tütün və tütün məhsulları, həmçinin də ondan istifadə ilə bağlı atılan addımlardan da söz açdı: "Tütün məhsullarına verginin tətbiq edilməsi, siqaret kötüklərinin yerə atılmasına görə cərimələrin müəyyənləşməsi heç də pis tendensiya deyil. Bunlar da olmalıdır. Siqaretin ziyanlı təsirləri haqda dəfələrlə danışılsa da, heç bir fayda yoxdur. O səbəbdən düşünürəm ki, qiymət qalxdıqda siqaret çəkən şəxslər maddi ziyana görə ondan imtina etmək məcburiyyətində qalırlar".
"Bu gün Azərbaycanı narkomaniya bürüyüb və bunun qarşısını almaq mümkün deyil. Bu problem daha çox vəzifəli və imkanlı şəxslərin övladları arasında yayılıb. Bununla belə, imkansızların da bir çoxu bu bəlaya yoluxub. Bakının elə bölgələri var ki, orada hər 5 nəfərdən ikisi narkomandır" – deyə millət vəkili əlavə etdi.
Deputatın sözlərinə görə, bu gün narkotik transferi qonşu ölkələrdən məqsədyönlü şəkildə Azərbaycana yönləndirilir: "Bütün bunların, yaranacaq arzuolunmaz mənzərənin qarşısının alınması üçün narkomaniya və siqaretin zərərlərinə görə pulsuz müalicənin təşkil edilməsi faydalı addım olar".
F.Mustafa bir sıra məsələlərə də diqqət çəkdi: "Biz bəzən faydalı olanın yox, mənfəətin üzərində düşünürük. Səhiyyə, təhsil və digər sahələrdə də öncə biznes, daha sonra vətəndaşın problemi düşünülür. Bu cür dərmanların ölkəmizdə istehsalı məsələsi üzərində də düşünməliyik".
Qeyd edək ki, hələlik ölkəmizdə bu zərərli məhsula olan tələbatı azaltmaq üçün yalnız tütün və tütün məhsullarına vergi tətbiq olunur. Siqareti yerə atanlara isə cərimələr nəzərdə tutulur.
