Argentina futbolunun veteranı, “Milan”, “Latsio”, “İnter”, “Çelsi” və “Parma” kimi komandaların əfsanəvi oyunçusu Ernan Krespo UEFA-nın ulduz qonağı kimi Bakıya səfər edərək, fanatları ilə görüşdə avtoqraf-sessiya təşkil edib.
Dünyanın ən yaxşı 125 futbolçusu siyahısına daxil edilən məşhur argentinalı oyunçunun avtoqraf-sessiyası Bakıdakı UEFA Avropa Liqası muzeyində keçirilib.
Krespo 2019-cu il mayın 29-da Bakı Olimpiya stadionunda keçiriləcək UEFA Avropa Liqasının final oyunu ərəfəsində Bakıya ulduz qonaq kimi gəlib.
Azarkeşlər bir saatdan çox vaxt ərzində argentinalı futbolçu ilə şəkil çəkdiriblər, ondan avtoqraf alıblar. Bəziləri isə hətta onunla söhbət etməyə imkan tapıb.
Avtoqraf-sessiyadan sonra qısa brifinq keçirilib və Krespo jurnalistlərin suallarına cavab verib. O, görüşə gələnlərin hamısına təşəkkür edib və Bakıda bu qədər azarkeşi olmasından təəccübünü gizlətməyib.
