Təranə Xudabaxşiyeva, Sputnik Azərbaycan
BAKI, 1 oktyabr — Sputnik. UEFA Avropa Liqasının 2-ci turunda Azərbaycan komandası "Qarabağ" İngiltərənin "Arsenal" klubu ilə Bakıda qarşılaşacaq. Xarici media yazır ki, "Arsenal"ın erməni əsilli futbolçusu Henrix Mxitaryan Azərbaycana gəlməkdən imtina edir. Məlumatda deyilir ki, Mxitaryan Azərbaycana gəlməməklə bağlı özü qərar verib. O, Azərbaycan-Ermənistan müharibəsini səbəb göstərərək, təhlükəsizliyini qorumaq məqsədi ilə Azərbaycana gəlməkdən imtina etdiyini deyir. Hətta futbolçu deyib ki, əgər "Arsenal" Avropa Liqasında finala çıxsa və bu görüş Bakıda keçirilsə, o zaman bu məsələ yenidən müzakirə oluna bilər.
"Qarabağ" futbol klubunun mətbuat xidmətinin rəhbəri Nurlan İbrahimov Sputnik Azərbaycan-a açıqlamasında deyib ki, "Arsenal" klubundan hansı futbolçunun qarşılaşmada oynayacağı haqqında məlumatı yoxdur: "Bizim ixtiyarımız yoxdur, qarşı tərəfin hansı futbolçusunu gətirəcəyini müzakirə edək və ya onlara göstəriş verək. Sadəcə onu deyə bilərəm ki, erməni futbolçular Azərbaycana gəlməkdən və burada oyun keçirməkdən çox vaxt qaçırlar".
"Mxitaryan "Borussiya Dortmund" klubunda oynadığı zaman da belə edib. Belə ki, "Qəbələ" "Borussiya Dortmund" qarşılaşması zamanı da erməni əsilli futbolçu Bakıya gəlməkdən imtina etmişdi. Onu nəzərə alaraq deyə bilərəm ki, ola bilsin, yenə bu futbolçu Bakıya gəlməsin" — deyə İbrahimov əlavə edib.
