Bakıda "Mübarizlər" ekstremal layihəsinin növbəti mərhələsi baş tutub. Minə yaxın gənc maneələr, tikanlı məftillər və xəndəklər üzərindən keçərək qüvvəsini sınayıb.
Bizim hər birimiz televizorda ekstremal qaçışa baxmışıq. Burada insanlar ən çətin maneələri dəf edir, qorxunu və yorğunluğu bir kənara ataraq, gücünü toplayır və finişə çatmaq üçün bütün qüvvəsini sərf edir.
Bir çoxları bu mənzərəyə baxaraq ruhlanır və belə yarışda iştirak etməyə qərar verir. "Mübarizlər" layihəsinin iştirakçıları da belə şəxslər olub. Yarış Fövqəladə Hallar Nazirliyinin Bakı yaxınlığındakı təlim poliqonunda baş tutub.
Sağlam həyat tərzinin tərəfdarları, tələbələr, ofis işçiləri, idmançılar maneələr, xəndəklər, su ilə dolu çalalar, eniş və yoxuşları dəf etmək üçün toplaşıblar. Qaçışda 32 komandaya bölünən minə yaxın gənc iştirak edib. Məsafəni sona çatdırmaq üçün hamının gücü çatmasa da, iştirakçıların çoxu finişə çatıb.
Xatırladaq ki, belə qaçışlar bütün dünyada populyardır. "Mübarizlər" Rusiyada keçirilən "Qəhrəmanlar Liqası"nın analoqudur. "Qəhrəmanlar Liqası"nın müəllifi Kseniya Şoyqudur.
