BAKI, 22 noyabr — Sputnik. Dəyəri 9500 dollar olan 5.7 mühərrikli bir avtomobilin ölkəyə gətirilən zaman ödəniləcək gömrük və vergi xərcləri çox baha başa gələcək. Sputnik Azərbaycan xəbər verir ki, "VIP Escort" MMC-nin direktoru Rəşad Quliyev "Facebook" hesabında belə paylaşım edib.
O, Dövlət Gömrük Komitəsinin elektron kalkulyatorunda apardığı kiçik araşdırma zamanı dəhşətli nəticə əldə edib. Məlum olub ki, 2018-ci ildə, 9500 dollarlıq (16 min manatlıq) 5.7 mühərrikli bir avtomobilin ölkəyə gətirilən zaman ödənəcək gömrük və vergi xərcləri 80 min 840 manat 99 qəpiyə başa gəlir. Buraya aşağıdakılar daxildir:
Aksiz vergisi – 59120 manat
Mühərrikin işçi həcminə görə tutulan gömrük rüsumu – 6775.47 manat
Əməliyyat haqqı – 100 manat
Vəsiqə haqqı 20 manat
ƏDV 14790 manat 13 qəpik
Elektron gömrük xidmətinin göstərilməsinə görə – 30 manat
Elektron gömrük xidmətinin göstərilməsinə görə ƏDV – 5 manat 40 qəpik
Cəmi: 80840 manat 99 qəpik.
