BAKI, 25 sentyabr — Sputnik. İraqın şimalındakı Kürdüstan Muxtar Vilayətində müstəqillik referendumunun başlaması bölgədə vəziyyəti gərginləşdirib. Sputnik Azərbaycan Sözcü-yə istinadən xəbər verir ki, artıq Türkiyə Hərbi Hava Qüvvələrinə məxsus qırıcı təyyarələr İraqın şimalını bombalamağa başlayıb.
Ordudan verilən açıqlamaya görə, Zap, Avaşin-Basyan bölgələrində PKK düşərgələri yerlə yeksan edilib. Əməliyyat zamanı Türk Ordusu itki verməyib.
Öz növbəsində, İran ordusu da, dünəndən etibarən İraqın şimalını bombalamağa başlayıb. Rəsmi Tehran, onlarla terrorçunun öldürüldüyünü açıqlayıb.
Qeyd edək ki, bu gün İraqın şimalındakı Kürdüstan Muxtar Vilayətində müstəqillik referendumu keçirilir. Artıq muxtariyyətin lideri Məsud Bərzani də səsvermə məntəqəsinə gələrək səs verib. Referenduma İsraildən başqa heç bir dövlət dəstək vermir.
