BAKI, 24 avqust — Sputnik. Prezident İlham Əliyev "Qarabağ" futbol klubunun heyətini qəbul edib. Sputnik Azərbaycan bu barədə dövlət başçısının rəsmi saytına istinadən xəbər verir.
Qeyd edək ki, Ağdamın "Qarabağ" futbol klubu tarixi nailiyyətə imza atıb. "Qarabağ" Azərbaycan futbolu tarixində ilk dəfə Çempionlar Liqasının qrup mərhələsinə vəsiqə qazanıb.
"Qarabağ" dünən Danimarkanın "Kopenhagen" klubunun qonağı olub. Xatırladaq ki, komandalar arasında Bakıda keçirilən ilk oyun 1:0 "Qarabağ"ın xeyrinə başa çatmışdı. Təkrar oyun "Kopenhagen"in xeyrinə 2:1 hesabı ilə başa çatıb. İki oyunun ümumi hesabı 2:2 nəticələnib. Amma rəqib meydanında vurulan qol üstünlüyü "Qarabağ"ın tarixində ilk dəfə qrup mərhələsinə keçməsinə imkan verib.
