BAKI, 24 iyun — Sputnik. Paytaxt Bakıda təşkil olunan “Formula-1” üzrə Azərbaycan Qran-prisində komandaların sıralama yarışı başa çatıb. Sputnik Azərbaycan xəbər verir ki, bir saat davam edən yürüşdə 10 komandanın 20 deyil, 19 pilotu mübarizə aparmalı olub.
Çünki "Renault"un pilotu Colion Palmerin üçüncü sərbəst yarışda yanacaq sızması səbəbindən bolidinin mühərriki qəfil alışıb. Avtomobilin mühərriki tam yararsız hala düşdüyündən onun dəyişdirilməsinə ehtiyac yaranıb. Lakin bu, sıralama turuna kimi mümkün olmayıb.
Digər 19 pilot isə öz bolidləri ilə 6 kilometrlik Bakı trekində sabahkı sıralamanı müəyyənləşdirməyə çalışıblar. Ən yaxşı göstəriciyə “Mercedes”in pilotu Luis Hamilton imza atıb. Liderliyi qazanan idmançı 1:40.593 dəqiqəlik göstərici ilə sabah yarışa ilk pillədə başlayacaq.
Hamiltonun komanda yoldaşı Valterri Bottas start xəttində onu izləyərək ikinci yerdə dayanacaq. “Ferrari”nın pilotu Kimi Raykkonen isə 3-cü yerdə yarışa start verəcək.
