BAKI, 2 may — Sputnik. Beynəlxalq turizm zamanı turistlərin və ekskursantların gedəcəyi yerdə turist sığortası məcburidirsə, müvafiq turistlər və ekskursantlar Azərbaycan Respublikasının ərazisini tərk etməkdən qabaq onlara sığortalanma təklif olunur.
Sputnik Azərbaycan xəbər verir ki, bu “Turizm haqqında” yeni qanun layihəsinin 34-cü maddəsində əks edilib.
Həmin maddə "turizm sahəsində istehlakçıların sığortalanması" adlanır.
Maddəyə görə, nəzarət orqanı turist sığortası məcburi olan dövlətlər haqqında əldə etdiyi məlumatları mütəmadi olaraq dərc edir, həmçinin öz internet saytında yerləşdirir.
Turizm təşkilatçıları getmə turizmi halında turistlərə və ekskursantlara gedəcəkləri ölkənin sığortalama qaydaları və şərtləri haqqında məlumat verməyə borcludurlar.
Getmə turizmi halında turistlərin və ekskursantların müvəqqəti olacağı ölkənin (yerin) qanunvericiliyi ilə həmin ölkədə müvəqqəti olan şəxslərə göstərilən tibbi yardım üçün xərcin ödənilməsinə zəmanət verilməsi məcburi tələb kimi müəyyən edilmişdirsə, turizm təşkilatçısı belə zəmanətləri turistlərdən tələb etməlidir.
Turistlərin və ekskursantların tələbi ilə turizm təşkilatçısı turun keçirilməsi ilə bağlı sığorta xidmətlərinin göstərilməsinə kömək edir.
