İlham Əhmədov, Sputnik Azərbaycan
BAKI, 8 apr — Sputnik. Qəbələdə İslam Həmrəyliyi İlinə və İslamiadaya həsr edilən rəsm və əl işləri sərgisi təşkil olunub. Sputnik Azərbaycan-ın bölgə müxbiri xəbər verir ki, Qəbələ Mədəniyyət Mərkəzində təşkil edilən sərginin açılış mərasimində ölkənin tanınmış ziyalıları, Qəbələ Rayon İcra Hakimiyyətinin (RİH) nümayəndələri, təhsil və mədəniyyət işçiləri, gənclər iştirak ediblər.
Sərgidə ixtisasca müəllim olan Dilbər Tahirovanın hazırladığı əl işləri nümayiş olunub. Qonaqlar sərgidə sülhü, islam birliyini, barışığı, təbiəti tərənnüm edən əl işlərini yüksək qiymətləndiriblər. Qeyd edilib ki, bir neçə gündən sonra ölkəmizdə IV İslam Həmrəyliyi Oyunlarına start veriləcək.
Sərgidə rəngkarlıq, tikmə, oyma, kətan üzərində rəsm əsərləri, dekorativ tətbiqi sənət nümunələri nümayiş olunub. Təhsil Nazirliyinin təyinatı ilə İsmayıllı rayonu Vəng kənd orta məktəbində biologiya müəllimi işləyən Dilbər Tahirova çıxış edərək bildirib ki, uşaq yaşlarından rəsm çəkməklə, toxuma əl işləri və müxtəlif suvenir əşyalar hazırlamaqla məşğuldur. O, İslam Həmrəyliyi ili və gələn ay ölkəmizdə keçiriləcək mühüm beynəlxalq tədbir — IV İslam Həmrəyliyi Oyunları ilə bağlı fərdi sərgisini təşkil etmək qərarına gəldiyini və buna görə çox sevindiyini bildirib.
D. Tahirova sərgidə 70-ə yaxın rəsm əsəri və digər maraqlı əl işlərinin təqdim olunduğunu qeyd edib. "Bu, mənim ilk fərdi sərgimdir. İndiyədək mənim əl işlərim rayonda keçirilən bir çox sərgilərdə nümayiş olunub. Fərdi sərgimə xeyli vaxtdır ki, hazırlaşırdım. Ümid edirəm ki, əl işlərim hamının marağına səbəb olacaq".
