BAKI, 23 yan — Sputnik. İsrailin baş naziri Benyamin Netanyahu, İran xalqına mesaj göndərib. Netanyahunun ingilis dilində olan çıxışı, farsca alt yazı olaraq yayımlanıb. Sputnik Azərbaycan bu haqda Əl-Cəzirə-yə istinadən məlumat verir.
Sərt mesajlarında heç vaxt İran xalqını hədəf almadığını deyən baş nazir, bu mesajları mövcud rejimə ünvanladığını söyləyib: "Rejim rəsmiləri gündəlik çıxışlarında İsraili yerlə-yeksan edəcəklərini deyərək, düşmənçilik toxumları əkirlər. Bu, doğru deyil".
"Biz sizin düşməniniz yox, dostunuzuq. Bu rejim sizin azadlığınızı əlinizdən alıb. Halbuki, qürurlu tarixiniz, zəngin mədəniyyətiniz var. Teokratik tiranlıq sizi əsir aldı. Ümid edirəm ki, bu mesajım gənc, orta və yaşlı nəsil iranlılara çatacaq" — Netanyahu bildirib.
