BAKI, 30 dek-Sputnik. Rusiya prezidenti Vladimir Putin bəyan edib ki, Moskva Vaşinqtonun addımlarına cavab olaraq amerikalı diplomatları ölkədən çıxarmayacaq. Sputnik-in məlumatına görə, Putin deyib ki, Rusiyanın beynəlxalq praktikaya istinad edərək adekvat cavab vermək üçün bütün əsasları var.
"Moskva cavab tədbirləri görmək hüququnu özündə saxlayır, amma "mətbəx" diplomatiyası səviyyəsinə enməyəcək." — deyə dövlət başçısı qeyd edib.
Putin Barak Obama administrasiyasının addımını dost olmayan addım kimi xarakterizə edib və onu "gələcəkdə Rusiya-Amerika münasibətlərini zədələməyə istiqamətlənmiş təxribat" adlandırıb: "Bu, Rusiya ilə yanaşı Amerika xalqının da fundamental maraqları ilə ziddiyyət təşkil edir. Rusiya və ABŞ-ın qlobal təhlükəsizliyi qoruyub saxlamaqla bağlı xüsusi məsuliyyətini nəzərə alsaq, bu, bütünlükdə beynəlxalq münasibətlər kompleksinə zərbə vurur".
Onun sözlərinə görə, Rusiya-Amerika münasibətlərinin bərpası istiqamətində gələcək addımlar ABŞ-ın seçilmiş prezidenti Donald Trampın həyata keçirdiyi siyasətdən asılı olacaq: "Biz amerikalı diplomatlara problem yaratmaq istəmirik. Biz onları heç vaxt ölkədən çıxarmayacağıq. Onların ailələrinə və uşaqlarına Yeni il bayramında vərdiş etdikləri istirahət yerlərinə getməyi qadağan etməyəcəyik".
Bununla yanaşı, dövlət başçısı böyük jest edərək Amerika diplomatlarının uşaqlarını Kremldə keçiriləcək Yeni il şənliyinə dəvət edib, Amerika xalqını və Trampı təbrik edib.
Kreml ABŞ tərəfinin bu addımını "üç həftədən sonra vəzifəni tərk edəcək insanların aqressiyası" kimi qiymətləndirib. Rusiya prezidentinin mətbuat katibi Dmitri Peskov Moskvanın adekvat cavab tədbirləri görəcəyini bildirmişdi. Rusiyanın Xarici İşlər Nazirliyi prezident Vladimir Putini ABŞ səfirliyinin 31 və Amerikanın Sankt-Peterburqdakı baş konsulluğunun 4 əməkdaşını ölkədən geri göndərməyə çağırmışdı.
