BAKI, 1 iyul — Sputnik. 1 iyul 1911-ci ildə Sovet hərbi sərkərdəsi, Sovet İttifaqı marşalı (1978), Sovet İttifaqı Qəhrəmanı (1980), SSRİ müdafiə naziri (1984-1987), Böyük Vətən Müharibəsinin iştirakçısı Sergey Leonidoviç Sokolov dünyaya gəlib.
Sokolov 18 iyun Pusiya imperiyasının Tavrida quberniyasının Yevpatoriya şəhərində (indiki Krım) qulluqçu ailəsində anadan olub. 1917-ci il Oktyabr inqilabından sonra ailəsi ilə birlikdə Vyatski quberniyasının Kotelniç şəhərinə köçüb və gələcək marşalın uşaqlıq illəri bu şəhərdə keçib.
1932-ci ildə Qızıl Ordu sıralarına daxil olub. Komsomol göstərişi ilə Qorki şəhərində yerləşən zirehli tank məktəbinə daxil olmaq hüququ qazanıb. Qəbul imtahanlarını müvəffəqiyyətlə verən S. Sokolov 1932-1934-cü illərdə bu məktəbin kursantı olub, vzvoda və rotaya komandirlik edib.
Ordu hazırlığını əla qiymətlərlə başa vuran Sokolov Uzaq Şərqə tank qoşunlarında hərbi xidmətə göndərilib, burada vzvod, pota və batalyon komandiri vəzifələrində işləyib. O, tank rotasının komandiri kimi 1938-ci ildə Xasan gölü ətrafındakı döyüşlərin iştirakçısı olub.
Sokolov Böyük Vətən Müharibəsi dövründə — 1941-ci ilin iyun-sentyabr aylarında tank alayının ştab rəisi kimi Qərb cəbhəsində döyüşlərdə iştirak edib. 1941-ci ilin oktyabrından Fəhlə-Kəndli Qızıl Ordusunun Avtozirehli tank idarəsi rəisinin böyük köməkçisi, 1942-ci ilin iyun ayından bu idarədə ştab rəisi, 1943-cü ilin yanvar ayından 1944-cü ilin mart ayınadək Karel cəbhəsinin zirehli tank və mexanikləşdirilmiş qoşunlarını İdarəetmə komandanlığının ştab rəisi olub.
1967-ci ildə SSRİ müdafiə nazirinin birinci müavini vəzifəsinə təyin edilib. O, 12 aprel 1967-ci ildə ordu generalı, 17 fevral 1978-ci ildə isə Sovet İttifaqı Marşalı rütbəsinə layiq görülüb.
Sovet İttifaqı Qəhrəmanı, marşal Sergey Sokolov 1984-1987-ci illərdə SSRİ-nin müdafiə naziri postunu tutub. O, 1987-ci ildə alman pilot Matias Rustun idarə etdiyi kiçik təyyarə Moskvanın Qızıl Meydanına icazəsiz, maneəsiz endiyinə görə vəzifədən azad olunub.
Sergey Sokolov 2012-ci ildə 101 yaşında vəfat edib.
