Frankofoniya həftəsi çərçivəsində Paytaxtdakı Boulevard Hotel Baku-da İsveçrə, Azərbaycan və Fransadan olan aşbazlar nəfis və adi xörəklərin hazırlanması ilə bağlı "Azərbaycanda İsveçrə mətbəxi"nə dair master-klass keçiblər. Sputnik xəbər verir ki, tədbiri İsveçrə səfirliyi Azərbaycan Milli Kulinariya Assosiasiyasının iştikarı ilə təşkil edib.
Master-klassda Kulinariya Akademiyasının, ixtisaslaşmış kolleclərin şagirdləri və gənc aşbazlar iştirak ediblər. Burada İsveçrə, Azərbaycan və Fransa mətbəxinə aid xörəklərin hazırlanma texnikası praktiki olaraq göstərilib.
İsveçrədən olan baş aşbaz Paskal Ober bir neçə ənənəvi İsveçrə yeməyi, o cümlədən də, şokoladlı desert hazırlayıb. Azərbaycanlı baş aşbaz Orxan Muxtarov, toyuq ləvəngisinin və gürzənin hazırlanma qaydasını göstərib. O, bunların hazırlanma texnikasını bir qədər dəyişərək ora İsveçrə çalarlarını əlavə edib. Fransız baş aşbaz Tibo Bera göbələkdən qozlu salatın hazırlanmasını nümayiş etdirib.
Master-klassdan sonra aşbazlar iştirakçıların suallarını cavablandırıblar və bəzi reseptləri dəqiqləşdiriblər. Onların hazırladıqları yeməklərin dequstasiyası keçirilib.
