BAKI, 18 fev-Sputnik. Azərbaycanın xarici işlər naziri Elmar Məmmədyarovun rəhbərlik etdiyi nümayəndə heyəti Gürcüstana yola düşüb.
Bu barədə Sputnik-ə Xarici İşlər Nazirliyinin mətbuat xidmətindən məlumat verilib. Səfərin məqsədi Azərbaycan, Gürcüstan və Türkiyə xarici işlər nazirlərinin fevralın 19-da Tiflis şəhərində keçiriləcək üçtərəfli görüşündə iştirak etməkdir.
Bu, üç ölkənin nazirlərinin bu formatda beşinci görüşü olacaq.
Qeyd edək ki, Türkiyənin xarici işlər naziri Mevlüt Çavuşoğlu bu gün Azərbaycanda işgüzar səfərdə olub. O, həm Azərbaycan Respublikasının prezidenti İlham Əliyevlə, həm də xarici işlər naziri Elmar Məmmədyarovla görüşüb. Mevlüt Çavuşoğlu Gürcüstana Azərbaycandan gedəcək.
Onu da qeyd edək ki, Gürcüstanın hakim "Gürcü arzusu" partiyasının idarə heyətinin üzvü, Gürcüstan Azərbaycanlılarının Milli Konqresinin (GAMK) sədri Əli Babayev Sputnik-ə bildirmişdi ki, E.Məmmədyarovun Tiflis səfəri zamanı iki ölkə arasındakı münasibətlər, o cümlədən, orada yaşayan azərbaycanlıların problemləri müzakirə ediləcək.
Əli Babayev demişdi: "Azərbaycan məktəbləri çox pis gündədir. Çünki kadr problemi var. Azərbaycanlı kadrlar lazımdır. Burada Azərbaycan dili inkişaf etdirilməlidir, ancaq dövlət dili gürcü dili olduğu üçün gərək azərbaycanlılar da bu dili öyrənsinlər. Mədəniyyətlə bağlı problemlər var ki, bu da həll olunasıdır. Bu günlərdə Azərbaycanın xarici işlər naziri Gürcüstana gələcək. Mövcud problemləri danışıb həll edəcəklər."
