BAKI, 7 yan-Sputnik. Cənubi Koreya Amerika qüvvələrinin Koreya adasında yenidən genişləndirilməsi məqsədilə ABŞ-la danışıqlar aparır.
Sputnik RİA novosti-yə istinadla xəbər verir ki, bu barədə Cənubi Koreyanın hərbi dairələrindəki mənbə məlumat verib.
Mənbə konkret olaraq hansı strateji qüvvələrdən söhbət getdiyini dəqiq deməkdən imtina edib.
ABŞ və Cənubi Koreya arasında danışıqların getdiyi barədə məlumat Şimali Koreyanın hidrogen bombasını sınaqdan keçirdiyi barədə məlumatın yayılmasından bir gün sonra ortaya çıxıb.
Dünyanın əsas nüvə dövlətlərinin simasında beynəlxalq ictimaiyyət Pxenyanın nüvə silahını sınaqdan keçirməsi barədə məlumatı narahatlıqla qarşılayıb və bunun regionun təhlükəsizliyi ilə bağlı situasiyanı gərginləşdirəcəyini ifadə edib.
Xatırladaq ki, analoji reaksiyanı ötən gün Rusiya da verib. Prezident Vladimir Putin Pxenyanın hidrogen bombasını sınaqdan keçirməsi barədə məlumatın dəqiqliyini yoxlamaq barədə tapşırıq verib.
Rusiya Strateji Raket Qoşunları Baş Qərargahının sabiq rəisi, general-polkovnik Viktor Yesin isə deyib ki, Şimali Koreyanın hidrogen bombasını sınaqdan keçirməsi xəbərləri ilə bağlı təşviş bu ölkənin nə edəcəyi bəlli olmayan rejimə görədir.
Rusiya Federasiya Şurasının Müdafiə və təhlükəsizlik Komitəsinin sədr müavini Frants Klintseviç isə deyib: Hidrogen bombasının sınaqdan keçirilməsinə dair xəbərlər doğrudursa, bu, Koreya yarımadasındakı və bütün dünyadakı vəziyyəti ciddi mənada ağırlaşdıracaq.
Rusiya Federasiya Şurasının xarici əlaqələr komitəsinin sədri Konstantin Kosaçev hidrogen bombasının sınaqdan keçirilməsinin BMT TŞ tərəfindən qəbul edilən Nüvə Sınaqlarının Qadağan Olunması üzrə Müqaviləyə (CTBT) zidd olduğunu və Rusiyanın təhlükəsizliyinə ciddi surətdə təsir edəcəyini deyib. O, Şimali Koreyanın Rusiya ilə sərhəddi olduğunu, Pxenyanla Vladivostok şəhəri arasındakı məsafənin 700 kilometrdən az olduğunu qeyd edib. Onun fikrincə, bu səbəbdən Şimali Koreya Demokratik Xalq Respublikasının bu bölgədəki fəaliyyətləri Rusiyanın milli təhlükəsizliyinə ciddi şəkildə təsir göstərəcək.
