BAKI, 5 noy-Sputnik. Braziliyanın Rio-de-Janeyro şəhərində keçirilən Olimpiya oyunları başa çatsa da, bu oyunlara olan maraq azalmır. Dünın Milli Olimpiya Komitəsinin GoSport Baku mağazası ilə birgə layihəsinə start verilib. Layihənin ilk günü taekvondo idman növünə həsr olunub.
Sputnik xəbər verir ki, “Taekvondo günü” adlanan tədbirdə Rio-2016-nın iştirakçısı Fəridə Əzizova və Birinci Avropa oyunlarının qalibi Ayxan Tağızadə gənclər və uşaqlarla görüşüb, iştirakçıların suallarını cavablandırıblar. Eyni zamanda tədbirə qoşulan taekvondo idman növü ilə maraqlanan gənclər müxtəlif viktorinalarda iştirak edərək hədiyyələr qazanıblar.
MOK-un Marketinq departamentinin direktoru Mehman Kərimov bildirib ki, bu layihə Rio-2016-dan əvvəl ideya kimi var idi. Sadəcə idmançıların yarış öncəsi məşqləri bu layihəni gerçəkləşdirməyə imkan vermədi. “Olimpiada bitsə də oyunların həyəcanı davam edir. Azərbaycan komandası bu yarışda rekord qıraraq daha çox medal qazandı və bu ənənəni davam etdirmək lazımdır. Bunun üçün “Olimpiya gündəliyi 2020” sənəd toplusuna əsasən biz Tokio-2020 olimpiadasına kimi dayanmayacağıq və 4 il ərzində hər kəsi həyəcanda saxlayacağıq”.
M.Kərimov deyib ki, Azərbaycan idman ölkəsidir. Buna nəzərə alaraq olimpiada iştirakçılarını idmansevərlərlə görüşürdürməklə idmana marağı artıraraq tədbirlərdə çıxış edən uşaqları və gəncləri idmana cəlb etmək istəyirlər.
O qeyd edib ki, bu layihə gənclərə, perspektivli idmançılara gələcək idman karyeralarının inkişafı üçün motivasiya verəcək.
Olimpiya komitəsinin məsul işçisinın sözlərinə görə, layihə davamlı olacaq və bir çox olimpiya idman növlərini əhatə edəcək.
Taekvondo Federasiyasının vitse-prezidenti Niyaməddin Paşayev bildirib ki, belə tədbirlər idmanın inkişafına təkan verir: “Bu layihə tək taekvondonun deyil, bütün idmanın inkişafıdır. Valideynləri ilə gələn uşaqların məhz belə layihədə iştirakı idmana uşaqların cəlbi üçün böyük işdir. Belə tədbirlər davamlı olarsa, idmanın inkişafına böyük təsir göstərmiş olar.”
Birinci Avropa oyunlarının mükafatçısı Ayxan Tağızadə belə layihələrin keçirilməsinin çox müsbət hal olduğunu qeyd edib: “Sevinirəm ki, belə layihələr ölkəmizdə çox keçirilir. Bu həm biz idmançılara dəstək xarakteri daşıyır, həm də biz çalışırıq insanlarla, uşaq və gənclərlə ünsiyyət zamanı əldə etdiyimiz uğurları onlarla bölüşərək, onlarda idmana maraq yaradaq. Bunu edə biliriksə, bu bizim uğurumuzdur.“
