BAKI, 24 dekabr — Sputnik. Qarışıq döyüş növləri (MMA) üzrə azərbaycanlı döyüşçü Nəriman Abbasov erməni əsilli rusiyalı Eduard Vartanyana qarşı dueldə "Fight Nights" çempion kəmərini qoruyacaq.
Bu barədə Sputnik Azərbaycan-a Azərbaycan Peşəkar MMA Federasiyasının prezidenti Şəhriyar Abbasov deyib.
Abbasovla Vartanyan arasında "Fight Nights" çempion titulu uğrunda döyüş gələn ilin fevralında Moskvada keçiriləcək. 28 yaşlı Vartanyanın aktivində MMA üzrə 23 döyüş var ki, bunlardan 20-si qələbə, 3-ü isə məğlubiyyətlə başa çatıb.
Yerevan əsilli döyüşçü sambo üzrə Dünya Kubokunun sahibi, boks üzrə Rusiya çempionatının qalibidir. Şəhriyar Abbasov qarşıdakı yarışın onun üçün maraqlı olduğunu bildirib.
""Fight Nights" bizə Eduard Vartanyanla mübarizədə çempionluq kəmərini müdafiə etməyi təklif etdi və biz də razılaşdıq. Son zamanlar "Fight Nights" insanlar üçün maraqlı olacaq döyüşlər təşkil etməyə çalışır və bu mübarizə də onlardan biridir", - deyə Abbasov bildirib.
Onun fikrincə, Vartanyan ciddi rəqib və erməni əsilli güclü döyüşçüdür. Eyni zamanda, Azərbaycan tərəfi qarşıdakı döyüşün təşkilatçıları qarşısında bir şərt qoyub - dörd hakimdən ikisi azərbaycanlı olmalıdır.
"Vartanyan uzun müddətdir Rusiyada yaşayır və məhz bu ölkəni təmsil edir. Biz azərbaycanlı hakimlərlə bağlı şərti də məhz buna görə irəli sürmüşük. "Fight Nights" da bu şərti qəbul edib. Daha bir neçə detal da var ki, onların müzakirəsi davam edir", - deyə Abbasov bildirib.
Sözügedən görüşün gələn ilin fevralında Moskvada keçirilməsi gözlənilir. MMA Federasiyasının rəhbərinin sözlərinə görə, Vartanyan azərbaycanlı döyüşçü ilə təkbətək döyüşə razılıq verib.
"Əlbəttə, bu döyüş Nəriman üçün psixoloji baxımdan asan olmayacaq, amma o, özü bu döyüşə hazır olduğuna əmindir. Hər iki idmançı üçün bu döyüş ağır olacaq. Vartanyan sambo və tay boksu texnikasını mənimsəmiş universal döyüşçüdür. Bu döyüşü isə ona ən yaxşı hazırlaşan döyüşçü qazanacaq", - Federasiya rəhbəri deyib.
Yeri gəlmişkən, daha əvvəl belə bir məlumat yayılmışdı ki, Nəriman Abbasov "Fight Nights" çempion kəmərini qorumaq uğrunda rusiyalı Vener Qaliyevlə döyüşəcək, amma sonradan məlum oldu ki, bu döyüş Azərbaycan tərəfinin marağında deyil.
Nəriman Abbasov dekabrın 22-də Dağıstandan qayıdıb. O, UFC çempionu Həbib Nurməhəmmədovla atası Abdulmanap Nurməhəmmədovun məktəbində təlim keçirdi.
"Nəriman Abdulmanap Nurməhəmmədovun tələbələri ilə sparrinq keçirib ki, bu da çox faydalıdır. Düzdür, Həbib özü həmin vaxt Mahaçqalada deyildi, amma başqa məşhur döyüşçülər var idi - İslam Mahaçev, Məhəmməd Kərimov və başqaları. Odur ki, bu döyüşçülərlə sparrinq çox faydalı oldu", - deyə Abbasov bildirib.
Bundan əlavə, döyüşçü xaricdə daha iki təlim-məşq toplanışı keçirməyi planlaşdırır.
"Tailand və ABŞ-da da təlimlər keçməyi planlaşdırırıq. Düzdür, bizim maliyyə problemlərimiz var, ona görə də fevral döyüşünə tam hazırlaşa bilməmək ehtimalımız böyükdür", - deyə Abbasov əlavə edib.
