Eldar Tanrıverdiyev, Sputnik Azərbaycan
BAKI, 11 dekabr - Sputnik. Azərbaycan və Ermənistan jurnalistlərinin qarşılıqlı səfərləri ilə bağlı təklif bu ilin yanvar ayında Rusiya tərəfindən edilmişdi. Azərbaycan tərəfi də konstruktiv mövqe göstərərək bu təkliflə razılaşdı".
Sputnik Azərbaycan xəbər verir ki, bunu Beynəlxalq Münasibətlərin Təhlili Mərkəzinin (BMTM) sədri Fərid Şəfiyev bu gün keçirilən mətbuat konfransında deyib.
O vurğulayıb ki, qarşılıqlı səfərlər dövlətlərarası danışıqlarda hər hansı müsbət nəticə əldə olunduğu zaman faydalı ola bilər: "Təəssüflər olsun ki, dövlətlərarası danışıqlarda heç bir irəliləyiş yoxdur. Belə olan halda, qarşılıqlı səfərlərin effekti ola bilməz".
Qarşılıqlı səfər zamanı Ermənistan tərəfinin şou göstərdiyini deyən Mərkəz sədri qeyd edib ki, düşmən tərəfi qeyri-konstruktiv mövqe sərgiləyir.
O vurğulayıb ki, hazırda deputatların qarşılıqlı səfərləri ilə bağlı təklif var.
Qeyd edək ki, Azərbaycan və Ermənistan tərəfindən bu ilin 17-21 noyabr tarixlərində iki ölkənin KİV nümayəndələrinin səfər mübadiləsi təşkil olunub. Səfər çərçivəsində jurnalistlərimiz Ermənistanda, eləcə də ölkəmizin Dağlıq Qarabağ bölgəsində, o cümlədən Şuşa şəhərində olublar.
Erməni jurnalistlər isə azərbaycanlı həmkarları, QHT nümayəndələri, akademik dairələr, həmçinin Azərbaycanın Dağlıq Qarabağ bölgəsinin Azərbaycanlı icması ilə görüşüblər. Azərbaycanda olarkən erməni jurnalistləri həmçinin müsəlman, xristian və yəhudi dini ziyarətgahlarına baş çəkiblər.
Azərbaycandan Ermənistana gedən jurnalistlər “Trend” Agentliyinin baş redaktoru Elçin Vəliyev, "1news.az" saytının müxbiri Elşən Rüstəmov və “Vestnik Qafqaza-Azerbaycan”ın müxbiri Orxan Yolçuyevdir.
Ermənistandakı “Şant” telekanal;nın əməkdaşı Artyom Yerekyan, “Mediamaks” İnformasiya Agentliyinin baş redaktoru David Alaverdiyan və Qarabağdakı separatçı rejimin “İctimai TV”sinin əməkdaşı Edqar Elbakyan noyabrın 17-dən 21-dək Bakıda olublar.
Erməni jurnalistlər Gəncəyə də gediblər. Onların Azərbaycanda ictimai təşkilatların nümayəndələri ilə görüşdüyü, şahmat məktəbini ziyarət etdiyi və həmkarları ilə bir araya gəldiyi bildirilir.
