Tarixdə bu gün: 15 dekabr – FOTO
© Sputnik
Abunə olmaq
Bu gün müxtəlif illərdə dünyada və ölkədə baş verən hadisələr barədə Sputnik Azərbaycan-ın icmalında oxuyun.
BAKI, 15 dekabr — Sputnik. Dekabrın 15-də bir çox dünya şöhrətli aktyorlar, alimlər, idmançılar, yazıçılar və siyasətçilər dünyaya gəlib. Bu gün həmçinin tarixə düşən hadisələr də baş verib.
Dekabrın 15-də kimlər anadan olub?
Həsən Əliyev (1907-1993) - Azərbaycan alimi, ictimai-siyasi xadim, kənd təsərrüfatı elmləri doktoru və Azərbaycan Respublikasının əməkdar elm xadimidir. O, Ümummilli lider Heydər Əliyevin böyük qardaşıdır. Alim Cənubi Qafqaz torpaqlarının əmələ gəlməsinin və coğrafiyasının tədqiqinə, Azərbaycanda Beynəlxalq Bioloji Proqramın işlənib hazırlanmasında böyük əmək sərf edib.
Səttar Bəhlulzadə (1909-1974) - Azərbaycan rəssamıdır. O, əsasən təbiəti tərənnüm edən böyük lirik mənzərələri ilə tanınır.
Səttar Bəhlulzadə
© Sputnik / Kemale Aliyeva
Şəfayət Mehdiyev (1910-1993) – Azərbaycan alimi, neftçi-geoloq, pedaqoq və geologiya–minerologiya elmləri doktorudur. O, Abşeron yarımadasının neft yataqlarının istilik rejimi məsələlərini tədqiq edib.
Şəfayət Mehdiyev
© Sputnik / Валерий Шустов
Yanoş Boyyay (1802-1860) – macar riyaziyyatçısı və qeyri-evklid həndəsəsinin yaradıcılarından biridir.
Antuan Anri Bekkerel (1852-1908) - fransız fiziki, fizika üzrə Nobel mükafatı laureatı və radioaktivliyin kəşfçilərindən biridir. Onun şərəfinə Beynəlxalq Vahidlər Sistemində (SI) radioaktiv mənbənin aktivliyinin ölçü vahidi - bekkerel adlandırılıb.
Antuan Anri Bekkerel
© Getty Images / Culture Club
Nikolay Nikitin (1907-1973) - Rusiya memarı, tikinti konstruksiyaları sahəsində alim və RSFSR-in əməkdar inşaatçısıdır. O, Moskvada "Ostankino" televiziya qülləsinin layihəsinin müəllifidir.
Nikolay Nikitin
© Sputnik / Николай Кулешов
Oke Seyfart (1919-1998) – isveçli konkisürəndir. O, Olimpiya çempionu, Avropa çempionu və dünya rekordçusudur.
Don Conson (1949) – amerikalı aktyor, prodüser, rejissor və müğənnidir. O, "Oğlan və onun köpəyi", "Harli Devidson və kovboy Marlboro", "Maçete" və s. filmlərdə rol alıb.
Don Conson
© AP Photo / Matt Sayles
Li Con Ce (1972) - Cənubi koreyalı aktyor və modeldir. O, "Kalmar oyunu" serialında Ki Huna rolunun ifaçısıdır.
Li Con Ce
© AP Photo / Chris Pizzello
Dekabrın 15-də dünyada baş verən tarixi hadisələr
1840-cı ildə Napoleon Bonapartın külü təntənəli şəkildə Parisə köçürülüb.
1952-ci ildə Çin Hindistanın Koreyada barışıq planını rədd edib.
1984-cü ildə Sovet avtomatik planetlərarası "Vega-1" stansiyası işə salınıb.
2001-ci ildə ABŞ-ın müdafiə naziri Donald Ramsfeld Cənubi Qafqaza səfəri çərçivəsində Bakıya da olub. Bu, Pentaqon rəhbərinin Azərbaycana ilk səfəri idi. O, Heydər Əliyevlə Azərbaycan Respublikası ilə ABŞ arasında hərbi əməkdaşlığı müzakirə edib.
