Keçən il Azərbaycanda baş verən ən yaddaqalan hadisələrin fotoları

Keçən il Azərbaycan üçün idman hadisələri ilə zəngin oldu. İlin əvvəlində Bakıda batut gimnastikası, akrobatika gimnastikası və bədii gimnastika üzrə dünya kubokları keçirildi.

Fevralın 13-də Bakıda Heydər Əliyev Sarayının səhnəsində Tbilisinin Kral Milli Baleti ilk dəfə çıxış edib. Rəqqaslar artıq 80 ölkədə nümayiş etdirilmiş parlaq və sensasiyalı "Gürcüstan atəşi" şousunu təqdim ediblər.

Mart ayında azərbaycanlılar ənənəvi olaraq Azərbaycanın əsas və sevimli bayramlarından biri olan Novruzu qeyd ediblər.

Pravoslav xristianlar isə Pasxa bayramını qeyd ediblər. Bakıda Müqəddəs Miradaşıyan Qadınlar Kafedral Kilsəsində bayram ilahi mərasimi keçirilib.

May ayında Şuşada beşinci beynəlxalq "Xarıbülbül" musiqi festivalı keçirilib. Üç gün ərzində onun səhnəsində təkcə Azərbaycanın deyil, həmçinin, dəvət olunmuş ölkələrin ən yaxşı musiqi kollektivləri çıxış ediblər.

May ayında Azərbaycanın paytaxtı güllə və stend atıcılığı üzrə Dünya Kubokuna ev sahibliyi edib.

Keçən il Bakıda keçirilən ən möhtəşəm festivallardan biri TEKNOFEST oldu. Genişmiqyaslı tədbir zamanı tamaşaçılara maraqlı aviaşou və texnoloji yeniliklərin müxtəlif sərgiləri təqdim olunub.

2022-ci il həm də Bakıda ənənəvi beynəlxalq sərgilərin keçirilməsi ilə yadda qaldı:

15-ci Beynəlxalq Kənd Təsərrüfatı Sərgisi "Caspian Agro" və 27-ci Beynəlxalq Qida Sənayesi Sərgisi "InterFood Azerbaijan" Bakı Enerji Həftəsi çərçivəsində

27-ci beynəlxalq "Xəzər dənizinin neft və qazı" sərgisi

27-ci Azərbaycan Beynəlxalq "İnşaat" sərgisi

İtaliyanın Turin şəhərində keçirilən 66-cı "Eurovision" mahnı müsabiqəsinin finalında Azərbaycan təmsil olunub. Azərbaycandan olan iştirakçı Nadir Rüstəmli səsvermənin nəticələrinə və münsiflər heyətinin qərarına əsasən 106 balla 16-cı yeri tutub. O, "Fade to black" mahnısı ilə 15-ci nömrədə çıxış edib.

Konyada keçirilən V İslam Həmrəyliyi Oyunlarında Azərbaycan idmançıları 29 qızıl, 36 gümüş və 34 bürünc olmaqla 99 medal qazanıblar.

Bakıda, həmçinin, avtoidman həvəskarlarına unudulmaz emosiyalar bəxş edən "Formula 1" Azərbaycan Qran-prisi keçirilib.

Avqust ayında Bakıda Dənizkənarı Milli Parkda əfsanəvi Azərbaycan ifaçısı Müslüm Maqomayevin 80 illik yubileyi münasibətilə abidəsinin açılışı olub.

Avqust ayında Bakıda "Beynəlxalq Ordu Oyunları-2022" çərçivəsində "Dəniz kuboku" yarışı da keçirilib.

Azərbaycanın yunan-Roma güləşçisi Eldəniz Əzizli (55 kq) ikiqat dünya çempionu olub. Belqradda keçirilən final görüşündə Əzizli Gürcüstan təmsilçisi, 2019-cu ilin dünya çempionu Nuqzari Tsurtsumiyanı 8:0 hesabı ilə məğlub edib.

"Qarabağ" futbol klubu avrokuboklarda iştirakını davam etdirib. Qurban Qurbanovun yetirmələri Avropa Liqasının qrup mərhələsini üçüncü pillədə başa vuraraq Konfrans Liqasının pley-off mərhələsində mübarizəni davam etdirəcəklər. Burada Ağdam klubuna Belçikanın "Qent" klubu rəqib olub.

Sentyabrda Bakıda IV Beynəlxalq Müdafiə Sənayesi Sərgisi keçirilib. Sərgidə 26 ölkədən 200-dən çox şirkət iştirak edib, iştirakçılar arasında Rusiya, Bolqarıstan, Çin, Fransa, İtaliya, Niderlandın müdafiə sektorunun aparıcı şirkətləri var.

Sentyabrda Bakıda Ryazan vilayətinin şirkətlərinin sərgi salonu açılıb və burada 500 müxtəlif növ mal təqdim olunub. Noyabrda isə Bakıda Rus Evində Rusiya ali təhsil müəssisələrinin sərgisi açıldı. Burada Rusiya Federasiyasının Moskva, Sankt-Peterburq, Vladiqafqaz, Stavropol, Kazan, Qlazov, Həştərxan, Tula və Novoçerkassk kimi doqquz şəhərindən 16 universitet iştirak edirdi. Həmçinin, noyabrın 3-də "Rusiya-Azərbaycan Tarla Günü" kənd təsərrüfatı texnikalarının sərgisi keçirilib.

Oktyabr ayında Bakı Bulvarında dünyanın ən çox gözlənilən yarışlarından biri olan "Red Bull Car Park Drift"in milli finalı keçirilib.

Azərbaycan şahmatçıları dünya çempionatında tarixi uğura imza atıblar. Abdulla Qədimbəyli və Gövhər Beydullayeva Sardiniyada (İtaliya) keçirilən gənclər arasında (20 yaşadək) dünya çempionatının qalibi olublar.

Noyabrın 8-də Qələbə Günü münasibətilə Bakıda orkestrlərin müşayiəti ilə hərbi marşlar keçirilib.

Dekabrın əvvəlində Bakıda Azərbaycan Moda Həftəsinin (Azerbaijan Fashion Week - AFW) 13-cü mövsümü keçirilib. Layihə Azərbaycan və Qazaxıstan arasında diplomatik münasibətlərin qurulmasının 30 illiyinə həsr olunub.

Dekabrın 23-də Bakıda metronun yeni "Xocəsən" stansiyasının açılış mərasimi olub.

"Sputnik Azərbaycan" hər kəsə yeni ildə arzularının gerçəkləşməsini, həm özü, həm yaxınları, həm də ölkəmiz üçün daha çox sevinc və qürur hissi arzulayır.