Dövlət Bayrağı meydanı - Sputnik Azərbaycan, 1920
AZƏRBAYCAN XƏBƏRLƏRİ
Azərbaycana dair ən son xəbərlər və aktual məqalələr

Bayramla əlaqədar olaraq üç gün iş olmayacaq

© Sputnik / Murad OrujovBakı
Bakı - Sputnik Azərbaycan, 1920, 20.06.2022
Abunə olmaq
25-27 iyun tarixlərində bayramla əlaqədar olaraq 3 gün iş olmayacaq
BAKI, 20 iyun — Sputnik. Azərbaycan Silahlı Qüvvələri Günü ilə əlaqədar olaraq 26 iyun ölkədə qeyri-iş günüdür. Cari ildə 26 iyun tarixi həftənin bazar gününə təsadüf etdiyi üçün növbəti gün, 27 iyun tarixi qeyri-iş günü olacaq.
Bununla da ardıcıl olaraq 25, 26 iyun şənbə-bazara təsadüf etdiyi üçün 27 iyunun da qeyri-iş günü olması ilə işləyən şəxslər ardıcıl olaraq üç gün istirahət edəcəklər.
Qeyd edək ki, növbəti ayın 9-10 iyul tarixlərində Qurban bayramı qeyd ediləcək. Lakin bu tarixlər şənbə-bazara düşdüyünə görə növbəti günlər, yəni 11-12 iyul qeyri-iş günləri elan edilir.
Beləliklə, iyulda şənbə və bazar günləri də daxil olmaqla 2, 3, 9, 10, 11, 12, 16, 17, 23, 24, 30, 31 tarixləri iş günləri deyil.
Qeyd edək ki, mart və may ayları Azərbaycanda ən çox bayramların olduğu aylardır.
Əmək və Əhalinin Sosial Müdafiəsi Nazirliyinin Kollegiyasının 17 dekabr 2021-ci il tarixli Qərarı ilə 2022-ci il üçün iş vaxtı norması və istehsalat təqvimi təsdiq edilib.
2022-ci il üçün iş vaxtı normasında bildirilir ki, Azərbaycan Respublikasının Əmək Məcəlləsinə və Azərbaycan Respublikası Nazirlər Kabinetinin "2022-ci il üçün Novruz, Ramazan və Qurban bayramları günlərinin müəyyən edilməsi haqqında" 2021-ci il 1 dekabr tarixli 375 nömrəli Qərarına əsasən 2022-ci ildə aşağıdakı günlər iş günü hesab edilmir:
1, 2 yanvar –Yeni il bayramı;
20 yanvar - Ümumxalq Hüzn günü;
8 mart– Qadınlar günü;
20, 21, 22, 23, 24 mart – Novruz bayramı;
9 may - Faşizm üzərində Qələbə günü;
2, 3 may – Ramazan bayramı;
28 may – Müstəqillik Günü
15 iyun – Azərbaycan xalqının Milli Qurtuluş günü;
26 iyun – Azərbaycan Respublikasının Silahlı Qüvvələri günü;
9, 10 iyul – Qurban bayramı;
8 noyabr - Zəfər Günü;
9 noyabr – Azərbaycan Respublikasının Dövlət Bayrağı günü
31 dekabr – Dünya Azərbaycanlılarının Həmrəyliyi günü.
2022-ci ildə həftələrarası istirahət günlərinin iş günləri hesab olunmayan bayram günləri ilə üst-üstə düşməsi ilə əlaqədar olaraq beşgünlük iş həftəsində 3, 4 yanvar, 25 mart, 30 may, 27 iyun, 11, 12 iyul tarixləri, altıgünlük iş həftəsində 3 yanvar, 25 mart, 27 iyun, 11 iyul tarixləri istirahət günləridir.
2022-ci ilin fevral ayı 28 təqvim günündən, il isə 365 təqvim günündən ibarətdir.
2022-ci ildə beşgünlük iş həftəsində 241 iş günü (onlardan 7-si bayramqabağı və Ümumxalq Hüzn günü qabağı iş günləridir), iş günü hesab edilməyən 104 istirahət günü (onlardan 7-si iş günü hesab edilməyən bayram günləri ilə üst-üstə düşməsinə görə müəyyən edilən), iş günü hesab edilməyən 19 bayram (7-si istirahət günləri ilə üst-üstə düşən) və 1 Ümumxalq Hüzn günü vardır.
Azərbaycanda gündəlik normal iş vaxtının müddəti 8 saatdan, gündəlik normal iş vaxtına uyğun olan həftəlik normal iş vaxtının müddəti 40 saatdan artıq ola bilməz. Bir qayda olaraq, iki istirahət günü olan beşgünlük iş həftəsi müəyyən edilir.
2022-ci ilin iş vaxtı norması 40 saatlıq beşgünlük iş həftəsi üzrə 8 saatlıq iş günü hesabından müəyyən edilir. 2022-ci il üçün 40 saatlıq iş həftəsində iş vaxtının illik norması 1921 saatdır.
Altıgünlük iş həftəsi tətbiq edilərkən həftəlik norma 40 saat olduqda gündəlik iş vaxtının müddəti 7 saatdan və bilavasitə səhərisi gün istirahət günü olan iş gününün müddəti isə 6 saatdan çox ola bilməz.
Altıgünlük iş həftəsi olan iş yerlərində 40 saatlıq iş həftəsində çalışan işçilər üçün 2022-ci ildə beşgünlük iş həftəsi üzrə hesablanmış 1921 saatlıq illik iş vaxtı norması tətbiq edilməlidir.
2022-ci il üçün iş vaxtı norması və istehsalat təqvimi Əmək və Əhalinin Sosial Müdafiəsi Nazirliyinin rəsmi internet saytında (https://www.sosial.gov.az/istehsalat-t%C9%99qvimi-2022) da yerləşdirilib.
Xəbər lenti
0