SİYASƏT
Ölkənin ictimai-siyasi həyatına, xarici siyasətə, beynəlxalq siyasi gündəmə dair məqalələr

Milli Məclisin sədri Britaniya Baş nazirinin elçisini qəbul etdi

© Photo : Milli Mejlis of the Azerbaijan RepublicSahibə Qafarova
Sahibə Qafarova  - Sputnik Azərbaycan, 1920, 09.03.2022
Abunə olmaq
Milli Məclisin sədri iki ölkə arasında münasibətlərin dostluq və strateji tərəfdaşlıq xarakteri daşıdığını bildirib.
BAKI, 9 mart — Sputnik. Bu gün Milli Məclisin sədri Sahibə Qafarova Böyük Britaniya Baş nazirinin Azərbaycan üzrə ticarət elçisi Baronessa Emma Nikolson ilə görüşüb.
Milli Məclisin Mətbuat və ictimaiyyətdə əlaqələr şöbəsindən Sputnik Azərbaycan-a verilən xəbərə görə, Sahibə Qafarova Emma Nikolsonun ölkəmizə bir neçə dəfə səfər etdiyini vurğulayaraq, bu səfərin ikitərəfli münasibətlərin daha da dərinləşməsinə töhfə verəcəyinə inamını ifadə edib.
Bu il Azərbaycanla Böyük Britaniya arasında diplomatik əlaqələrin qurulmasının 30 illiyinin qeyd olunduğunu söyləyən Milli Məclisin sədri iki ölkə arasında münasibətlərin dostluq və strateji tərəfdaşlıq xarakteri daşıdığını bildirib.
Sahibə Qafarova ölkələrimiz arasındakı əlaqələrin inkişafında parlamentlərin müsbət rolunu vurğulayaraq, qeyd edib ki, ali qanunverici orqanlarımızın üzvləri arasında xoş münasibətlər mövcuddur. Hər iki ölkə parlamentlərində İşçi qrupları uğurla fəaliyyət göstərirlər.
Böyük Britaniya Baş nazirinin Azərbaycan üzrə ticarət elçisi Baronessa Emma Nikolson da ölkələrimiz arasında münasibətlərin yüksək səviyyəsini qeyd edərək, 30 il ərzində ikitərəfli əlaqələrdə əldə olunmuş nailiyyətlərdən danışıb. O, həmçinin, parlamentləarası münasibətlərin də uğurlu inkişafından razılığını bildirib, deputatlarımızın Avropa Şurası Parlament Assambleyası çərçivəsində əməkdaşlığını qeyd edib.
Görüşdə 44 günlük Vətən müharibəsində Azərbaycan torpaqlarının işğaldan azad olunmasından sonra regionda yaranmış yeni vəziyyət, azad olunmuş ərazilərimizdə aparılan geniş bərpa və quruculuq işləri haqqında da məlumat verilib.
Milli Məclisin sədri bildirib ki, hazırda Azərbaycan işğaldan azad olunmuş ərazilərdə öz imkanları hesabına genişmiqyaslı infrastrukturun yaradılması, yeni müasir yolların salınması, elektrik enerjisi ilə təminat işləri ilə yanaşı, ərazilərin minalardan təmizlənməsi istiqamətində də tədbirlər həyata keçirir. Bu işlər məcburi köçkünlərin öz yurd-yuvalarına təhlükəsiz şəkildə qayıtması üçün çox vacibdir.
Görüşdə həmçinin ölkələrimiz arasında iqtisadi, ticarət, təhsil, mədəniyyət və digər sahələrdə əməkdaşlığın genişləndirilməsinə dair fikir mübadiləsi aparılıb.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.
Xəbər lenti
0