https://sputnik.az/20220224/azerbaycan-ve-rusiya-hesablasmalarda-manat-ve-rubldan-istifade-edecek---serh-439560298.html

Azərbaycan və Rusiya hesablaşmalarda manat və rubldan istifadə edəcək - ŞƏRH

Azərbaycan və Rusiya hesablaşmalarda manat və rubldan istifadə edəcək - ŞƏRH

Sputnik Azərbaycan

Deputatın sözlərinə görə, növbəti dövrdə iki ölkə arasında ticarət dövriyyəsində həm də milli valyutalardan istifadə edilməsi imkanları geniş olacaq. 24.02.2022, Sputnik Azərbaycan

2022-02-24T18:53+0400

2022-02-24T18:53+0400

2022-02-24T19:03+0400

azərbaycan

iqtisadiyyat

rusiya

manat

https://cdnn1.img.sputnik.az/img/42230/73/422307322_0:0:2001:1125_1920x0_80_0_0_2465c18be80498605e5c54b15449279d.jpg

BAKI, 24 fevral — Sputnik. Azərbaycan və Rusiya hesablaşmalarda milli valyutalardan istifadə edəcək. Bu, "Rusiya və Azərbaycan arasında müttəfiqlik qarşılıqlı fəaliyyəti haqqında Bəyannamə"də öz əksini tapıb.Sənədə əsasən, tərəflər qarşılıqlı hesablaşmalarda milli valyutalardan istifadəyə, bank kartlarına birgə xidmət daxil olmaqla ödəniş sistemlərinin qarşılıqlı uyğunluğuna, eləcə də iki ölkənin bankları arasında birbaşa müxbir münasibətlərin inkişaf etdirilməsinə imkan yaradacaqlar.Tərəflər idxal-ixrac imkanlarını genişləndirə biləcəklərMəsələ ilə bağlı deputat Vüqar Bayramov Sputnik Azərbaycan-a deyib ki, "Rusiya və Azərbaycan arasında müttəfiqlik qarşılıqlı fəaliyyəti haqqında Bəyannamə" iki ölkə arasındakı iqtisadi əlaqələrin genişləndirilməsinə xidmət edəcək: "Bəyannamədə eyni zamanda iqtisadi məsələlər də öz əksini tapıb. Tərəflər qarşılıqlı olaraq investisiya qoyuluşlarını artırmaq və eləcə də idxal-ixrac imkanlarını genişləndirə biləcəklər. Bu, xüsusən də Rusiya və Azərbaycanın qarşılıqlı daha çox mal idxal və ixrac etməsinə imkan yaradacaq".Rusiya Azərbaycanın idxalda ən böyük tərəfdaşıdırDeputat bildirib ki, Rusiya Azərbaycanın qeyri-neft ixracatında ən böyük ticarət tərəfdaşıdır: "2,7 milyard dollarlıq ümumi qeyri-neft ixracatımızın təxminən üçdə biri Rusiyanın payına düşür. Eyni zamanda, Rusiya Azərbaycanın idxalda ən böyük tərəfdaşıdır. Azərbaycanın Rusiyadan idxalı 2 milyard dollara yaxındır. O baxımdan qarşılıqlı olaraq bankların müxbir hesab açmaq imkanları və gələcəkdə milli valyutadan istifadə imkanlarının nəzərdə tutulması həm də xarici ticarətin genişləndirilməsi baxımından vacibdir"."Bu, daha çox orta və uzunmüddətli dövrdə reallaşacaq hədəflərdir"Onun sözlərinə görə, bu, qısamüddətli hədəflər deyil, daha çox orta və uzunmüddətli dövrdə reallaşacaq hədəflərdir: "Kənar region ölkələri dollardan istifadəyə daha çox önəm verirlər. Güman olunur ki, növbəti dövrlərdə də iki ölkə arasında ticarət dövriyyəsində dollar və ya avroya üstünlük veriləcək. Amma mərhələli şəkildə Bəyannaməyə uyğun olaraq gələcəkdə milli valyutalardan, xüsusən də bir sıra məhsulların idxal və ixrac zamanı istifadə imkanları mümkündür. Bütövlükdə sənəd bunun üçün bir baza formalaşdırıb"."Bu isə ondan xəbər verir ki, növbəti dövrdə iki ölkə arasında ticarət dövriyyəsində həm də milli valyutalardan istifadə edilməsi, o cümlədən ticarət dövriyyəsinin həcminin daha da artırılması imkanları geniş olacaq", -deyə millət vəkili əlavə edib.Qeyd edək ki, 22 fevral 2022-ci il tarixində Azərbaycan Respublikası Prezidenti İlham Əliyevin Rusiya Federasiyasına rəsmi səfəri çərçivəsində Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin tərəfindən "Rusiya Federasiyası və Azərbaycan Respublikası arasında müttəfiqlik qarşılıqlı fəaliyyəti haqqında Bəyannamə" imzalanıb.Sənədə görə, Azərbaycan və Rusiya milli qanunvericilikləri çərçivəsində metallurgiya, neft-qaz və ağır maşınqayırma, aviasiya, avtomobil, kimya, əczaçılıq və yüngül sənaye, kənd təsərrüfatı, yol-tikinti və qida maşınqayırması müəssisələri arasında iqtisadi əlaqələrin daha da inkişaf etdirilməsinə imkan yaradacaqlar.İki ölkə arasında ticarət dövriyyəsi 3 milyard dollar olubXatırladaq ki, 2021-ci ildə Azərbaycan ilə Rusiya arasında ticarət dövriyyəsi 3 milyard ABŞ dolları olub. Bunun 2,1 milyard dolları Rusiyadan idxalın, 0,921 milyard dolları isə bu ölkəyə ixracımızın payına düşür.Ötən il Rusiya ilə ticarət xarici ticarət dövriyyəmizdə 8,83 faiz paya malik olub. O cümlədən qonşu ölkənin idxalımızda payı 17,72 faiz, ixracımızda payı isə 4,15 faiz təşkil edib.2020-ci illə müqayisədə Rusiya ilə ticarət 12,1 faiz, bu ölkəyə ixrac 29,8 faiz, bu ölkədən idxal isə 5,7 faiz artıb.Digər maraqlı xəbərləri həmçinin Sputnik Azərbaycan-ın Teleqram kanalından izləyin.

2022

xəbərlər

ru_AZ

azərbaycan, rusiya, manat