SİYASƏT
Ölkənin ictimai-siyasi həyatına, xarici siyasətə, beynəlxalq siyasi gündəmə dair məqalələr

Mahmud Məmməd-Quliyev Bali Demokratiya Forumunda nədən danışıb?

© Photo : APAXarici işlər nazirinin müavini Mahmud Məmməd-Quliyev
Xarici işlər nazirinin müavini Mahmud Məmməd-Quliyev - Sputnik Azərbaycan, 1920, 09.12.2021
Abunə olmaq
Sessiyada onlayn formatda iştirak edən M.Məmməd-Quliyev çıxışında Azərbaycanın COVİD-19 pandemiyası ilə qlobal mübarizəyə verdiyi töhfələri vurğulayıb, ölkəmizin "vaksin millətçiliyinə" qarşı çıxdığını qeyd edib.
BAKI, 9 dekabr — Sputnik. İndoneziyada Bali Demokratiya Forumunun "İnsanlıq üçün demokratiya: pandemiya dövründə iqtisadi və sosial ədalətin təşviq olunması" mövzusunda 14-cü sessiyası keçirilib.
Bu barədə Sputnik Azərbaycan-a Xarici İşlər Nazirliyindən məlumat verilib.
Tədbirdə Azərbaycanı xarici işlər nazirinin müavini Mahmud Məmməd-Quliyev təmsil edib.
Sessiyada onlayn formatda iştirak edən M.Məmməd-Quliyev çıxışında Azərbaycanın COVİD-19 pandemiyası ilə qlobal mübarizəyə verdiyi töhfələri vurğulayıb, ölkəmizin "vaksin millətçiliyinə" qarşı çıxdığını qeyd edib. Bu xüsusda o, Azərbaycan Respublikası Prezidentinin təşəbbüsü ilə ölkəmizin Qoşulmama Hərəkatının sədri qismində təklifi əsasında 2020-ci ilin dekabrında BMT Baş Assambleyasının xüsusi sessiyasının keçirildiyi, eləcə də Qoşulmama Hərəkatı adından Azərbaycanın irəli sürdüyü "Bütün ölkələrin vaksinlərə bərabər və universal əlçatanlığının təmin edilməsi" barədə qətnamənin BMT-nin İnsan Hüquqları Şurasında konsensusla, BMT Baş Assambleyasının 3-cü komitəsində isə dövlətlərinin böyük əksəriyyəti tərəfindən dəstəklənərək qəbul edildiyini xatırlatmışdır. Nazir müavininin çıxışında, həmçinin ölkə daxilində pandemiya dövründə əhalinin sosial və iqtisadi hüquqlarının təmin edilməsi istiqamətində görülən tədbirlər öz əksini tapıb.
Nazir müavini M.Məmməd-Quliyev 2020-ci ilin noyabrın 10-da imzalanmış üçtərəfli bəyanatla Ermənistan və Azərbaycan arasında 30 ilə yaxın davam etmiş münaqişəyə son qoyulduğunu, 44 günlük Vətən müharibəsindən sonra ölkəmizin ərazi bütövlüyünün təmin olunduğunu tədbir iştirakçılarının diqqətə çatdırıb. Davamlı sülhün və inkişafın Azərbaycanın gələcəyə baxışının əsasını təşkil etdiyini bildirən nazir müavini, üçtərəfli bəyanatların tam həyata keçirilməsinin mühüm əhəmiyyətə malik olduğunu vurğulayıb.
Çıxışı zamanı nazir müavini, əsrlər boyunca müxtəlif etnik və dini qrupların birgə, dinc yaşadığı Azərbaycanın dinlərarası və mədəniyyətlərarası dialoqun təşviqinə önəm və töhfə verməsindən bəhs edib. Bu xüsusda ölkəmizin bir sıra beynəlxalq tədbirlərə ev sahibliyi etdiyi vurğulanıb.
Forumda bir çox dünya və region dövlətlərinin ictimai və siyasi xadimləri, o cümlədən ABŞ dövlət katibi Entoni Blinken və Türkiyənin xarici işlər naziri Mövlud Çavuşoğlu çıxış etmişlər.
Məlumat üçün bildirmək istərdik ki, Bali Demokratiya Forumu İndoneziya hökumətinin təşəbbüsü ilə 2008-ci ildən etibarən keçirilir və Asiya-Sakit okean və daha geniş regionda demokratiyanın müsbət təcrübələrin mübadiləsi yolu ilə təşviqinə xidmət etməkdədir.
Xəbər lenti
0