Pandemiya dövründə tətbiq olunan məhdudiyyətlər gündəlik həyatımıza bir sıra yeniliklər gətirdi. Azərbaycan da bu baxımdan istisna təşkil etmir – ölkə vətəndaşları məsafədən iş və təhsil təcrübəsinin mənimsəməklə yanaşı, məsələn, müxtəlif məhsul və xidmətləri onlayn sifariş etməyə başladılar.
Media Təhlil Mərkəzinin rəy sorğusu göstərib ki, hazırda əksər vətəndaşlar onlayn-çatdırılma xidmətindən istifadə edirlər. Sorğu nəticəsində məlum olub ki, ölkə əhalisinin kifayət qədər çox hissəsi onlayn sifariş və çatdırılma xidmətinə ayda 5 dəfədən çox müraciət etmir. Ölkə əhalisinin bu baxımdan ən fəal qrupu bir ayda 10 dəfə sözügedən xidmətlərdən yararlanır. Amma belə insanların sayı cəmi 7,8% təşkil edir.
Sorğu onu da göstərib ki, restoran və kafelərin çatdırılma xidmətini gücləndirdiyi bir vaxtda əhali onlayn xidmətlərdən daha çox yemək sifarişlərində istifadə etməyə başlayıb. Belə ki, hazırda yeməyi internetdən sifariş edənlərin sayı 41,6% təşkil edir. Marketə getmək əvəzinə qida məhsullarını internetdən sifariş edənlər isə 4,2 faizdir. Bir sözlə, rəyi soruşulanların təxminən yarısı onlayn-xidmətlərə yemək və qida məhsullarının sifarişi üçün baş vurur.
Ölkə əhalisinin başqa hansı məhsulları sifariş etdikləri və bu zaman daha çox hansı üsuldan yararlandıqları barədə geniş məlumat Sputnik Azərbaycan-ın xüsusi infoqrafikasında öz əksini tapıb.
