İyunun 26-sı ölkəmizdə Azərbaycan Respublkası Silahlı Qüvvələri Günü kimi qeyd olunur. Ordu gününün qeyd olunması barədə fərman 1992-ci il 18 sentyabr tarixində verilib və 1991-ci ildə Azərbaycanın dövlət müstəqilliyinin bərpasından sonra Azərbaycan ordusunun yaradılması barədə qərarının qəbul edildiyi tarix – 9 oktyabr Silahlı Qüvvələr Günü elan edilib. Daha sonra, Azərbaycan Prezidentinin 22 may 1998-ci il tarixli Fərmanına əsasən, bundan əvvəlki sənəd qüvvədən düşürülüb və 26 iyun Azərbaycan Respublikası Silahlı Qüvvələri günü elan edilib.
Əslində, Azərbaycanda ordu quruculuğunun tarixi daha qədimdir. Belə ki, 1918-ci il mayın 28-də Azərbaycan Demokratik Respublikası elan olunandan sonra iyunun 26-da Milli Ordunun yaradılmasına başlanılıb. Avqustun 1-də isə AXC-nin Hərbi Nazirliyi təsis edilib. General Səməd bəy Mehmandarov dekabrın 25-də hərbi nazir, general-leytenant Əliağa Şıxlinski nazir müavini təyin ediliblər.
Azərbaycan yenidən müstəqillik əldə edəndən sonra ordu quruculuğuna yalnız 1993-cü ildən başlamaq mümkün olub. Bu dövrdən etibarən ölkədəki silahlı qüvvələr dövlətin tam nəzarətinə keçib.
Lakin uzun illər Azərbaycanda bu günü bayram əhval-ruhiyyəsində qeyd etmək mümkün olmayıb. Ərazilərinin 20 faizi düşmən işğalı altında olan ölkədə Silahlı Qüvvələr Gününün qeyd olunmasına ən azından mənəvi cəhətdən haqqımızın çatmadığını düşünürdük.
Nəhayət, 2020-ci ildə Azərbaycan Ordusu öz tarixi missiyasını yerinə yetirərək işğal altında olan torpaqlarımızın böyük bir hissəsini, eləcə də Qarabağın döyünən ürəyi Şuşanı ermənilərdən təmizlədi. Minlərlə şəhidin qanı hesabına vətən torpağı düşmən tapdağından qurtuldu. Beləliklə, uzun illərdən sonra məhz bu gün Azərbaycan Silahlı Qüvvələri Gününü əsl bayram kimi qeyd etməyə haqqımız çatır. Bayramın mübarək, Azərbaycan əsgəri!
